Xasanik
lesa konudgu
Xasanik oğuneşi ndğas Ç̆armaturi ğali golunʒ̆oru do
seri lesa konudgu. Jur- sum fara lesa çxomite oypşu do Xasanik nifik̆iru- ki:
“Ma haʒ̆i ha çxomi oxorişa mendebiğa do ç̆umen ç̆umandele
ordoşa gepta do xolo çxomi keşebiğare”.
Xasanik çxomi moik̆idu do oxoşa eşit̆u-şi, Zaimişi
mezaluğik̆ala ar didi muntxani konagu. Xasanis didoaşkurinu, ama guris guri
gyobažgut̆u. Xolo ha didi şei-na t̆u, Xasanis konaxolu. Xasanik medoʒ̆k̆eduşi,
ha didi muntxa- na t̆u, Germa-k̆oçi t̆udoren. Germa- k̆oçis k̆at̆a k̆ibiri tito
mt̆k̆o uğut̆u. Nuk̆u mʒ̆k̆uli uğut̆u. Xasanis –na var aşkurinu- şeni hamus
mteli konanç̆u do Xasanik uʒ̆u ki:
“Si, k̆oçi, ma gza momçi! Oxoris mçumenan, ordo
bidare, dido dulya miğun! Ç̆umen ç̆umandele- ti ordo gelaptare, hemuşeni- ki,
lesa ğalis memidgin, çxomi gemabğasen! Hak goʒ̆oxti vana ti dogibarum”.
Hem oras
Germa- k̆oçik – Bro! Bro! Bro- ya- do muntxanepe duʒ̆u. Germa- k̆oçik Xasanis
nak̆ap̆u do ğalis kodoluk̆ap̆u.
Xasanişi nanak- Bere var moxtu- ya- do ç̆ak̆las nunʒ̆u
do ğalişe gextu- şi, Xasani t̆obas doložit̆u. Hek kožiru do Xasani ezdu do
oxorişa mendoyonu.
Xasani dido oras žabuni cant̆u. Xasanis dido- na
aşkurinu- şeni, haʒ̆i ʒ̆ori var ap̆aramiten. Nena zop̆ont̆aşi, geladginen.
[Sergi Jiğent̆i,
“Ç̆anuri T̆ekst̆ebi”, T̆pilisi, 1938]
K̆irali
do mç̆k̆eşi
Ar dğas k̆iralik dido ok̆obğala dovu do miletis uʒ̆u-ki:
“Ma nena var bzop̆on do xete bip̆aramitare, he op̆aramitu- na oxoʒ̆anasen, k̆oçi çkimi
“mok̆amdginu” p̆ʒ̆opxare”.
Dido p̆ofesorepe do çkinaperi k̆oçepe ides, ama k̆iralik
na noguru, mitis var oxaʒ̆onu.
A’ndğas mç̆k̆eşik kognu do k̆iralişa mendaxt̆u. Dido
k̆oçepe renan.
K̆iralik mç̆k̆eşis xe ok̆ondrik̆u do noguru,
hemindoras mç̆k̆eşik didi k̆iti noğiru. K̆iralik didi k̆iti noğiru. Mç̆k̆eşik
jur k̆iti noguru.
Milliyetik k̆iralis k̆itxes:
“Si xe- na ok̆ondrik̆i do noguri, mun ort̆u?”
K̆iralik uʒ̆u- ki:
“Dunya mugvala ren-” ma buʒ̆vi, muk miʒ̆u- ki:
“Dunya mugvala ren, ama si-ti arteği ren”.
Ar k̆iti meboʒ̆iri- şi, muk jur k̆iti memoʒ̆iru.
Heya itkven- ki, “Tangri arteği ren”- ma, buʒ̆vi- şi, “Majurani Tangri sin
ore”- a, miʒ̆u.
Hemindoras mç̆k̆eşik uʒ̆u- ki:
“K̆iralik xe ok̆ondrik̆u do miʒ̆u- ki, ar hak̆onari
somuni komomiği-a, miʒ̆u.
Ma- ti buʒ̆vi- ki:
“Si haya mogiğare- ma do, didi k̆iti meboğiri.
Xolo miʒ̆u- ki:
“Si ar toli eşegiğare”-a do ar k̆iti memoğiru. Ma-
ti jur- k̆iti meboğiri:
“Jur toli si eşegiğare”- ma, buʒ̆vi do haşote içodu
hetepeşi didi ok̆obğala.
K̆iralik tku-
ki: “Ma na ptkvi, nenape mteli mç̆k̆eşik koxoʒ̆onu”-ya.
Hemindoras miletik dido nožiʒes k̆iralis.
[Sergi Jiğent̆i, “Ç̆anuri T̆ekst̆ebi”, T̆pilisi,
1938]
