Nek̆na Koguinʒ̆k̆en
Ma aʒ̆i Xopas pskidu. Kyoi çkimi
Bucaği en, sifteni, ʒ̆oxleni kyoi- Mskibuli. Nana Mskibulişen t̆u do çkini yei
ek miğut̆es. Oxoiti miğut̆es ek. Ek virdet̆i. Mektebis vik̆itxupt̆işi, ak movit̆it,
Xopaşa, Bucağis pskidut̆it. Yazis, ondi iqvat̆uşi, tatili, Mskibulişa vit̆it.
Nana ek iqvet̆u, baba ulut̆u- mulut̆u. ʒ̆oxle na vigui nena Lazui t̆u.
Turkuliti iğağalet̆u, miçkit̆es. Mektebişa na vidit ilki, em zamanis Turkuli
oxovoktap̆t̆it. Ma mʒika k̆ai miçkit̆u do bazi beepek Turkuli, Lazui uxuktap̆t̆es.
İlki na iguran nena Lazui t̆u da em zamanis! En zoi kitabi ok̆itxu t̆u, Turkçe
ik̆itxaginon da okulis! Emuşeni dido zoi t̆u oguu.
Oxorca-
çkimi Lazi va en, Turki en, Lazuri va uçkin, emuşeni çkini beres va uçkin ia.
Emuşeni mutu va itkven do nana muşi, baba muşi Lazi na enti va uçkin, va
ğarğalapan. Sifte Lazuri oğarğaluti oncğore t̆u. Mʒikati yasaxi t̆u. Yasaği t̆u,
ama mitik mutu va uʒ̆umert̆u. Ama mektebis ğarğalaşi, giqurt̆es, muellimik uqurt̆u:
“Lazuri mot ğarğalaptya!” Arteğik: “Amuk Lazuri ğarğalapsya” do p̆olisis uʒ̆vas
na, “Si mot ğarğalapt̆i!”- giʒ̆umert̆u, ama mutu va iqvet̆u.
Çkini
arkadaşepeş arasti, doloxe Lazuri va bğarğalapt. Ar dğas xut saat̆i bğarğalat
na, xut nena, vit nena Lazui bğarğalapt. Emuşeni aʒ̆i Lazui dido k̆ai mitis va
uçkin, guiç̆k̆endinen.
Aʒ̆i
nek̆na na guinʒ̆k̆u, oğarğalus koguiç̆k̆u. Ekolen na mulvan Sarpulepes k̆ai
uçkinan. Ma Vanilişi Cemali k̆ala
bğarğalişi, eşo miʒ̆u: “ Çkin miçkit̆es ki, tkvan Lazui dido k̆ai giçkinan.
Mcve k̆oçepek, çkini nana- babapek: ‘Lazuri va gogoç̆k̆ondan! Ç̆umen nek̆na
koguinʒ̆k̆en, a ndğas koguinʒ̆k̆enya, - tkumert̆es,- Lazui miçkit̆an!’ Eşo moguapt̆esya.
Çkinti emuşeni va gomoç̆k̆ondes. Çkin ptkvit ki, tkvan Lazui dido k̆ai
giçkinan. Çkin tkvanden daa k̆ai miçkit̆eenan, tkvan kogogoç̆k̆ondeenan, ç̆it̆a giçkinanya”, - tku Cemalik. Mtiniti eşo en. Aʒ̆i
man Sarpuli Lazepe k̆ala bğarğalap, dido k̆ai Lazui
uçkinan.
Ma
Xopas na gamapti, vit̆oxut ʒ̆anei vort̆i. Rizinis vik̆itxi, emuşk̆ule P̆olişa
vidi. Lazuri va iğağalen ki ek. Şkvit ʒ̆anaşk̆ule ak mopti, Xopaşa mopti, ama
Xopasti va iğarğalen ki. Uğağalu- uğağalu kogomoç̆k̆ondes. Na bğarğalap̆t̆it,
Turkuli oxoktapei, mu miçkin, ia-aya oxoktapei! Aʒ̆i iğarğalen a jur- sum ʒ̆ana
ren, na nek̆na guinʒ̆k̆u. Muşeni iğarğalen? Lazuri oguu şeni var! Emus Lazuri
uçkin, emus Lazui uçkin, gyurculi uçkin,
nungaps, Megrelce uçkin, emuşeni- oğarğalu.
[Tahsin Çepoğli, 06 VI 1992 Xopa
(Guram K̆art̆ozia, Lazuri T̆ekst̆ebi II, “418 (52, 1)” Gamomʒemloba “Meʒninereba”,
Tbilisi, 1993)]
Guram K̆art̆ozia [31.X. 1934- 9. XII. 2010]
