Ot̆rik̆eş Oç̆opu
Ot̆rik̆eş Oç̆opu başk̆a
avcobas var nungaps. Emuş oç̆opuşi ustape, mzoğap̆icisna skidunan, Lazepe
renan. Aya dulyaşeni oxazirus gyoç̆k̆apan Çuruğaişi tutas.
Ʒxeniş k̆udelişi
nǯaiten xamanǯa gamak̆irupan do mtxirişi bigas nuk̆irupan. Aya biga, gverdi
elakteri, let̆as noʒigapan. Bigas jur tane k̆oli nuk̆irapan. K̆olikna opaʒxalus
gyoç̆k̆as, ğaç̆ok kožirops do oç̆k̆omuşeni bigasna gelaxedas, nǯaişi xamanǯas
k̆uçxe dolvalen do konik̆iden.
Ğaç̆o koç̆opanşik̆ule,
tolepes ekole- akole meşinişi parça elonʒaxapan. Aya meşini emuşeni elonʒaxapan-
ki, jindolenna muit̆as, sifteri var žiras do bigaşen var geputxas.
Ğaç̆os bigas gelaxunu
do ostiramu ogurapan. Ağustoziş tutana moxtas, mindiqonupan koxişa. Koxina
uǯume(r)nan, ya but̆k̆aloni qaepeten ç̆it̆a oxoristeri k̆idupan do doloxe
molaxeduman, sifterik var mžiranya.
Koxişi yanis mexsus
şveri sum quconi mosa jur bigas mek̆ireli kodoʒigapan, ok̆vaçxe muşi ğaç̆o
bigas kogeloxunapan do çumernan sifteris gamažiru.
Sifterina havas
gamižirasteri, mosas ok̆vaçxe ğaç̆o gyuǯurapan. Sifterikna z’iras, ğaç̆os gyat̆k̆vaʒen jindolen. Am vakitis koxis
molaxuneri k̆oçik ğaç̆oş biga ok̆vaçxe muizdips do sifteri mosas meşalaps.
K̆oçi nulun, usul- usul xe nimes sifterik̆ele do hem ustvinups do aşoten
kogyak̆neps, hama sifterik ç̆angepeten xeepe duç̆angups.
Sifteri xesna
dikaçanşik̆ule, oǯk̆ernan tolepes, gup̆icis, k̆udelis, soti mutu k̆usuri var
uğut̆asya. Tolepe do gup̆ici sari perişi uğunna, ya k̆ai cinsişi şinapan. Eger
aşo perişi sifteri koç̆opuna k̆oçik, emoras zop̆ons- ki, na mint̆usteri sifteri
kop̆ç̆opia.
Mcveşi xesap̆iten
Ağustozis şkvitis noç̆opine sifteri k̆ai şinapan.
Sifteris, oç̆opinu
koxişen ayri xolo, mantatenti ç̆orupan. Manta ncaşi jin giluk̆idapan. Ncas orta
yerişi qaepe gok̆vatupan do ar biga kogondumerman. Am bigaşi ok̆vaçxe mosa
guǯutumernan. Mosa t̆urasteri ç̆eri ren. Gzas donoç̆k̆inde sifterikna žiras,
ncaşi orta yeris msk̆vaşa biga gondvaleri ren, moşvacinuşeni kogelaxedun. Ǯoxle
muşi mosana guǯutun, var žirops do na geputxas, mosas kodololaps.
Ç̆opineri sifteriş jur
k̆uçxepes do şkas tok̆i gyudumernan. Sum tok̆is uci gverdi met̆roşik̆ule
ok̆ok̆irupan do uci xes dikaçepan. Xes gelaxunu ogurapan. Ar- jur ndğas p̆at̆i
ç̆angups, ek̆ule- ek̆ule gyargen do aşoten gyorginapan sifteri.
Gergine(r)i sifteris
çapan ucumeli xorʒi do markvali giberi. Sekt̆emberişi tutas t̆aronina ok̆oxvas,
em axçamis gyari var çapan. Majura ç̆umani mşkironeri sifteri mindiqonupan
adaşa.
Sifteris şkas tok̆is
(bel- bağis) nuk̆irapan, eç- eçdoxut met̆roşa meskuroni (yedeği) do xes
kodilinsvarupan, sifterik̆ala birdem xes kodilikaçepan. Ot̆rik̆ena yeputxas,
xeşen naşkumernan. Sifteri ot̆rik̆es gyotxozun meskuronis gondarapaşa do
meç̆işuna, koç̆opups. Ot̆rik̆ena koç̆opas, sifteri kodoxedun. K̆oçi meskuroni
monsvaeli nulun do ç̆angepeşen ot̆rik̆e guǯuqonups.
Bazi k̆oçik sifteri eşo
gyorginaps- ki, meskuronişen ayri niqonups ot̆rik̆e oç̆opinuşa.
Ot̆rik̆eşi ogoru do
yeputxinu coğoriten iqven. Eger coğori var uqorunna, biga dikaçeps xes do
buçkepes do çaepes geçaps. Aşoten ot̆rik̆e yeputxinaps.
Dido ot̆rik̆ena iqvas,
ndğas ar koçik oş- oş jureneçdovit taneşa ot̆rik̆e ç̆orups. Didona ç̆opas,
oxorişa mjora gyulas mulun, mitik va mžiras do toli var momit̆alasya. Aǯi ne
ot̆rik̆e ren do neti sifteri, t̆ofeğepe uğunan mtelis.
[Muxamed Abdul- K̆adiris že Vanilişi (Dabadebuli 1909 ǯels), Nodar
K̆ak̆abaže, “Lazuri T̆ekst̆ebi”, Gamomʒemloba Art̆anuci, Tbilisi, 2018]
