Neferiş gelak̆idu
Andğa maanşa ndğa ren,
ak gelauxer do ʒas ar t̆oroci var mik̆ilu. Sekt̆emberişi tutana giç̆k̆u do ak
eşapti, hala ak gelauxer do sum faraşen met̆i var mişibğu t̆oroci neferis.
Man çkimi berobas
mşuns- ki, aya yerepes boine neferepe giludgit̆es do t̆oroci ç̆orupt̆es. K̆ai ç̆umanişi
işit̆es do axçamişa ar yuki t̆oroci gimert̆es. Muk̆o p̆at̆i t̆oroci t̆uk̆on,
boşi miti var git̆u. T̆oroci do başka k̆vinçi, sivircuği iqven yokse başka mç̆ipe
k̆vinçepe, Sekt̆emberina dodgitaşk̆ule, gyoç̆k̆apan oxtimus t̆uʒa memleketepek̆ele.
K̆işis ak var dodgitunan, Yazis aşo mulvan Rusies duzepeşa do yovati ak ikipan.
Ek̆ule geri guiktenan do nulvan.
Aǯina voǯk̆er xalis, t̆orocepe
dido var renan. Sivte ğalisteri nit̆es ʒas. Aǯi ar- jur suri mik̆ilaps, eti
dido jin, ne neferis mişibğen do neti t̆ofeğiten iqvilen. Aǯi avcepeti dido
renan. Didi- ç̆it̆as mtelis t̆ofeği okaçun. T̆orocis ncas gelaxunus vakiti var
meçapan.
T̆orociti yeşkurdineri
ren do dido jin nulun. Zamanis Goniaşi adapes, gyolepeşi tikenluğepes, dido t̆orocepe
iqvet̆es: Ndğaleri adapes cupt̆es, ser tikenluğepeşi ncaepes incirt̆es.
Tikenluğis doloxe t̆orocepe ek̆o iqvet̆es- ki, t̆ofeği varti vastomert̆it. Ek
ne k̆oçi do ne coğori var amalet̆u. Tude gyoli gedgit̆u, jinti ncas p̆at̆i daži
uğut̆u do k̆oçis var amalet̆u. Gale duzişana gamaxtat̆es, em oras t̆ofeği
vastomert̆it. Adas doloxe ar nca dgit̆uk̆oni, ek illa t̆oroci gyabğasint̆u.
Çkinti mevit̆it do ncas tude komeşapxedut̆it do ekolen p̆ilupt̆it.
Cumadi skani Alis ar ç̆it̆a
t̆ofeği uğut̆u. Seis gverdis yiselt̆u do mtelişen ordo mindit̆u adaşa. İa
yükseği ncaşi tude kododgitut̆u, gyaroba var iqvat̆uşa, yuki dikipt̆u do
oxorişa komuit̆u.
T̆oroci gyarobaşa iqven
dido, ek̆ule gyaritenna dižğat̆es,
tikenluğis meşaxedut̆es. Gonias adaşana moxtat̆es, ar tutaşa ek iqvet̆es. K̆aixeşana
kamuişvacat̆es do dimgvanat̆es, em vakitis nit̆es başka yerişa. Goniaş duzis
yeseleri t̆oroci ʒxemurluğis tepes mujilapt̆u. Aya tepepes boine neferi giludgit̆es.
Adas duzis yeputxineri t̆oroci aya tepeşa eşaxtimapaşa dvaç̆k̆indert̆u do tepes
hepten tude mujixiralt̆es, sotxani na gamanç̆valeri yeri t̆u, ek mik̆ilapt̆es. Gamanç̆varelisti
neferi geludgit̆u do mteli kodilibğert̆u. Bazi t̆orocişi suri dido jin mulun,
em vakitis t̆ofeği vastomert̆it do mteli suri uk̆uibğert̆es do tudendon
diliqanet̆es do neferis mişibğert̆es.
Zamanis t̆ofeğina didopes
var uğut̆esşeni, megerem aşo ikipt̆erenan: Ncaşi
t̆op̆acisteri gamaqazupt̆erenan do kvaşurduliten, t̆orocis surina muit̆uk̆on,
astomert̆erenan. Aya ncaş t̆opacina nit̆as,
sersi ikips. T̆orocis uçkin- ki, şahini gemotxozunya do suri uk̆uibğen do
tudendon gyulun do neferis mişibğen.
Aya dulyaşi didi ustape
t̆erenan İrizelepe. T̆orocis suri sotxanina muit̆uk̆on, entepek ena unt̆es,
yeris gyonç̆apt̆es. Eger suri nantas jilendon muit̆uk̆onşi, kvaşurduli jilendon
astomert̆es do ǯale geloçkumert̆es. Ǯale nit̆uk̆onşi, daa ǯale dodgiturt̆es do
kvaşurdulis ostomiluten jilendon eloçkumert̆es do neferis meşobğapt̆es.
Çkimi delik̆anlobas
dido manta miğut̆u. Man çoği burç̆uli meç̆arelis tepes gelaudgipt̆i. Ekonaşi t̆orociti
dido iqven do mç̆ipe k̆vinçiti. Mç̆ipe k̆vinçi yano- yano iqvet̆u. K̆işina giç̆k̆at̆u,
mç̆ipe k̆vinçi dağişen ǯalendo git̆es. Ğecit̆alaxonas tepeşen ǯale kyoiluğişa
git̆es. Tepes dido tude mujixiralt̆es. Mteliti ar yerişen git̆es. Em yeriş
gelaudgipt̆it neferi do axçamik̆elena eşaptat̆it, neferi yopşa iqvet̆u. K̆vinçi
k̆alatepeten oxorişa kageimert̆it do obundğoluşi noderi vikipt̆it. Ena
dobundğolat̆it, dergepes domcumorupt̆it do k̆işişeni koşeinaxept̆it. İa
ncumoreli k̆vinçişi tuli- tuli gyarepe vikipt̆it, hama mtelişen k̆ai xolo
buldurcinişi xorʒis gyari renya.
K̆vinçepena nit̆an t̆uʒa
memleketepek̆ele, k̆arta k̆vinçi ayri- ayri gzaşen nulun. Buldurcini çoği
mzoğas jin nulun, p̆at̆i t̆orocina gexvadas, gale gamulun do mzoğap̆icis
dibğen. Xolo t̆oroci çoği daği do daği nulun, çoğiti mzoğap̆icepeşi duzepes
goloqupan, hama aǯi zop̆onan- ki, k̆vinçepek mutepeşi oxtimoni gza
diktiresya. Mzoğap̆icepek̆ala aǯi ç̆it̆a
nulvan. Çoği dağepek̆ele nulvan emuşeni-ki, ek oşkurinoni mutu var ren.
Tepepena mik̆ilan, ok̆açxe dik̆aş duzepe ren do ek muişvacepan. Ekolen doğu yeri
muşişa nulvan.
[(K̆adir Memişişi (Çaǯelia sop. Sarpi, 1970 ǯ.) Nodar K̆ak̆abaže, “Lazuri T̆ekst̆ebi”, Gamomʒemloba Art̆anuci,
Tbilisi, 2018]
