aliihsanaksamaz.blogspot.com: Helimişi Hasan’ın Şiir ve Tabloları- 1

Helimişi Hasan’ın Şiir ve Tabloları- 2/ Helimişi Xasanişi şiiri do suretepe- 2:

https://aliihsanaksamaz.blogspot.com/2023/03/helimisi-hasann-siir-ve-tablolar-2.html

Helimişi Xasanişi şiiri do suretepe- 1

Onçamure

Ar ç̆uç̆ut̆a memingam sinti ma, onçamure,
Jur k̆uçxonepesteri si şuroni çka mu re.
Sin gcaxums p̆ant̆a dingik do çkvaşeni ibaxer,
Var gelagişvels mitik, dingik̆ala ibaxer.
Mʒudişi ibaxert tkvan xark̆işi brincişeni,
Var miçkin, mu ganç̆enan do ibaxert çkvaşeni.
He brinci skani iven, si xvala nçxvarumt̆aşa,
Dinçxvaraşi, çkva nimt̆en ç̆uvalepeten çkvaşa.
Ne na gejodgin dingis k̆ulanişi ren ia,
Neti na xaçku dadis aʒ̆i aç̆k̆omen ia,
Çkva hemuşi pilavi ağa do beis anç̆en,
Dadi çkimis mendrale xvala p̆ici aʒ̆k̆aren.
Dopstiburt̆i, mis uçkin, vort̆ik̆on na mat kvaşi,
Mu na ren, mus uçkin dingis, xveneri ncaşi!
Si kvaş xveneri re na, nuxondi dingiş bigas,
Aʒ̆iti nciris re na, dişkaşi re, giçkit̆as!

(Helimişi Xasanişi Şiiri do sureti (Guram K̆art̆ozia, “Lazuri T̆ekst̆ebi- II”, Tbilisi, 1993)

Sarpi Moleni

Sarpi çkinis bulbulepek ibiran,
Mis var užirun Sarpi, moxtan, žiran,
Port̆uk̆aliş, limoniş pukirişi
Şurapeş doloxe goxtan do ižğan.

Sarpi moleni, Sarpi moleni,
Pukinoras skani şuras k̆oçi dižğeni?
Ha K̆olmanis na var ixels, miti diqveni?

Elamtepes mitam k̆oçis užiʒams
Hak bulbulik pukrinoras ubirams,
Çaip̆icis dostiberen zoğa, cans
Pukurepeş şuraten ar ixi bars.

Sarpi moleni, Sarpi moleni,
Pukinoras skani şuras k̆oçi dižğeni?
Ha K̆olmanis na var ixels, miti diqveni?

K̆ulanepek ağne çai ʒ̆iluman,
ʒ̆iluman do Lazuriti ibiran,
Ncaşen ncaşa k̆inçepe goputxunan,
Ha k̆olmanis kva do ncakti ixelan.

Sarpi moleni, Sarpi moleni,
Pukrinoras skani şuras k̆oçi dižğeni?
Ha k̆olmanis na var ixels miti, diqveni?

Komebaç̆vi he Sarpuli k̆ulanis,
Ma ar fara hea bžiri do çais,
Mskvana muşi muk̆oti bomʒkva na, ğirs,
Mendralaşen ma Lazuri gemabirs.

Sarpi moleni, Sarpi moleni,
Pukrinoras skani şuras k̆oçi dižğeni?
Ha k̆olmanis na var ixels miti, diqveni?

Si ma domç̆vi, e veraneş k̆ulani,
Daçxiri ren uça tolepe skani,
Si gžiraşi, mu mağoden, var miçkin,
Mot memilams xe do k̆uçxes dermani!

Sarpi moleni, Sarpi moleni,
Pukrinoras skani şuras k̆oçi dižğeni?
Ha k̆olmanis na var ixels miti, diqveni?

(Helimişi Xasani (Guram K̆art̆ozia, “Lazuri T̆ekst̆ebi- II”, Tbilisi, 1993)

Mşkiridoni

K̆aobaten, mşkiridoni!
Na kçumert̆it, koxoʒ̆oni,
Goputxi, ç̆opi k̆orğoni,
Mo bort̆at miti xçeoni!

Qinvaş tutapes si var t̆i,
So goputxi, p̆ia so rt̆i?
Muten skidi, mu ipxort̆i,
Vaşa soti ugyare t̆i.

Si paʒxa var ok̆ogixvit,
Moxtaea do si dokçvit,
Gonç̆eleri komomixtit,
K̆ai ye, haşo na moxelit!

Xolo paʒxa oşenare,
Ağne motape ordare,
Var mşunt̆aşa gondunare,
Qinvas paʒxa memişkvare.

Baba çkimiş yeri Faşi,
İyya mulun si moxtaşi,
Uk̆unikten, si idaşi,
Heti ulun, var moxt̆aşi.

Kimi Faşis kimi Tunas
İçalişeps nak̆o tutas
Derdi çkinik seri var cans
Qinva şeni para mogaps

K̆ata ʒ̆anas ok̆oviʒ̆k̆et
Ma do nanak eya pçumert
Ser ndğaleri gzapes viʒ̆k̆ert
Komoxtaşi viraxat̆et