Mtugişi ambai
Mtugik tkveen-ki: Maya mjoak̆ala dosti viqvaminonya,dunya
otanapsya do muşeni.”
Mjoak uʒ̆veen-ki: “Ma mu voe-ki, ar dumani mulun,
kogolamatven do dunya domʒ̆k̆upinaps”.
Mtugi igzalu dumanişa, uʒ̆u-ki: “Ma skanik̆ala dosti
viqvaminon, dunya omʒ̆k̆upinap do emuşeni”.
“Ma mu voe-ki, ixi mulun do dunya mok̆omodvanaps”.
İgzaleen ixişa mtugi, uʒ̆veen-ki: “Ma skanik̆ala
dosti viqvaminon”.
“Ma mu
voe-ki, sirtis ar ç̆k̆oni geladgin, muk̆o ʒ̆ana ren, mevacin do ia va gemaktu”.
Mtugi igzalu ç̆k̆onişa, ç̆k̆onis uʒ̆u-ki: “Ma skanik̆ala
dosti viqvaminon, dido ʒ̆anas nuxondut̆ee do emuşeni”.
“Çkimda mitis mutu va axvenen, hama tude kyokis
mitxanik puʒxolups; gemoktu-na, emuk
gemoktasinon!”
Mextuşi, mtugepe! Diqu xolo mtugepeş dosti.
[Guram K̆art̆ozia, Lazuri T̆ekst̆ebi- II, Tbilisi, 1993]
+
Loʒa Nena
Arte padişağik ducoxu gyay na uxenamt̆u k̆oçis do uʒ̆u:
“Henni nostoney mu ren, domixeniya!”
Hem k̆oçikti idu puciş nenaşi gyay duxenu do komuğu.
Padişağis komoʒ̆ondu he gyay do oç̆k̆omuşkule uʒ̆u
xolo: “Lumcişk̆ele açkva gyay domixeni, ama henni unostone vareya!”
Hem k̆oçik xolo puciş nena ezdu do daha k̆ay gyay
duxenu do menduğu.
Padişağik oç̆k̆omu gyay do uʒ̆u: “Ma si henni p̆at̆i
mixeni- ma na giʒ̆vaş yeis daha k̆ay
gyay mot mixeniya?”
“E,
padişağia- çkimi, _ uʒ̆u hem k̆oçik, _ dunyas iy k̆aoba do iy p̆at̆oba nenak
ikoms. Nenak mundesti k̆aoba zop̆ons, nostoney ren; mundesti p̆at̆oba zop̆ons,
daha loʒa do daha nostoney iven.”
[Guram K̆art̆ozia, Lazuri T̆ekst̆ebi- I, Tbilisi, 1972]
Abdessuzi Namazi
Nasrettin Xoca abdessuzi namazis kododgitu. Ncaş
tudele namazi ikoms.Ncasti ar k̆oçi gexen, ama Nasrettin Xocas va uçkin.
Namazi dovaşk̆ule Tangris uʒ̆umes-ki: “Namazi çkimia
k̆abuli via!”
Hem k̆oçik: “Va bikomya,”_ zop̆ons.
Heyak xolo uʒ̆umes-ki Tangris: “K̆abuli mixenia!”
“Va gixenamya!”
“Va mixenam na, va mixena, ma zati abdessuzi namazi
bik̆omt̆ia!” - uʒ̆udoen.
[Guram K̆art̆ozia, Lazuri T̆ekst̆ebi- II, Tbilisi, 1993]
Xoca do sum eşeği
Xoca sum eşeği kuonurt̆u. Ar eşeği kocexedu. Oʒ̆edusi,
eşeği cur on.
“Ma sum eşeği komionurt̆uya do ar tane so on ya?”
Eşeğişa kocexdu. Dok̆oreʒxusi, xolo sum! Xolo kocexedu
eşeği. Oʒ̆edusi, xolo cur on. cendi na cexen, va k̆oreʒxuy.
A k̆oçi nagu. “Xocaya, mu k̆oreʒxumya, mu oʒ̆erya?”
“Maya sum tane eşeği komionurt̆uya do ar tane so
onya?”
Uʒ̆u-çi: “ Ar tane si cexerya.”
“Mati eşeği borya?”
“Xoca, si na cexer var k̆oreʒxum, helbetde, eşeği
or.”
Xoca antxozu, “Sia eşeği muç̆o miʒ̆via maya.”
Ar tane cexedu, antxozu; jur tane ceri kodosk̆udu. Ek̆iʒ̆edu
ceri, eşeğepe va onan!
[Guram K̆art̆ozia, Lazuri T̆ekst̆ebi- II, Tbilisi, 1993]
Nusredini do k̆onkşimuşi
Nusredini mendaxtu k̆onkşi-muşişa, ç̆uk̆ali keuç̆opu,mendiğu
oxorişa.
Sum dğaşk̆ule ç̆uk̆alişi saibi mendaxtu ç̆uk̆alişa.
Nusredini kodolodgu ʒ̆ulu ç̆uk̆ali: “Aha, sk̆ani ç̆uk̆ali
mendiği!”
Himu: “Ham mu onya jur tanea?”
“Sk̆ani ç̆uk̆alia bere komoonuya.”
Himuti mendiğu.
Nusredini sum dğaşik̆ule mendaxtu, uʒ̆u-çi: “Ç̆uk̆ali komomçi!”
Komeçu himu.
Mendiğu Nusredini ç̆uk̆ali.
Xuti dğaşi mendaxtu ç̆uk̆alişa: “Nusredini, ç̆uk̆ali
komomçia!”
Nusredini: “ Ç̆uk̆ali doğuru.”
Himu: “Ç̆uk̆ali va ğurunya”.
“Ç̆uk̆ali bere dorinu, deiceri do mendiği, huy ç̆uk̆ali
doğuru do muşeni var icer!”
[Guram K̆art̆ozia, Lazuri T̆ekst̆ebi- II, Tbilisi, 1993]
Seferberluğişi Muaciri
Hamu bup̆aramitai?
Mu buʒ̆va?
K̆oçi- şkimi askeri ort̆u. Mtiri şkimik̆ala muaciri
mendafti. Atineşa mendaftitu. K̆oçi-şkimi komoxtu hik goç̆irderi- gobriʒ̆eri.
Askerişi çamaşuri mexu do majura kodolikunu, esk̆epe. Hiko komžirey şk̆u.
Hikolendo gobiktit, oxorişe komoftit. Oxori mutu var
ort̆u. Hikole-akole idare bikumt̆it.
Çoi gverdi var eiselu, var idu muaciri. Hini lazut̆i
kuğurt̆ey. Na bigzalitupeşi lazut̆i hini dok̆orobey. Aciği va gamiğamt̆ey,
aşkurinert̆ey. Şku bit̆it̆uşa lazut̆i
var uğurt̆ey.
Buʒ̆vitu: “So ziri lazut̆i?Bit̆ituşa va giğurt̆u do
huy so ziri?”
“Var miğun,”_ it̆urt̆u. Mt̆obaşa karmat̆e mkumt̆u
edo hişote imxort̆u mt̆obaşa.
[ Guram K̆art̆ozia, Lazuri T̆ekst̆ebi- II, Tbilisi, 1993]
