K̆at̆u
do Coğoi
Coğoi k̆at̆uşa dido duşmani ren. Muşeni giçkini? Moo
dogiʒ̆va.
K̆at̆u do coğoi ar vaxtis dido k̆ai manebrape t̆es.
Ar dğas coğoik k̆at̆us uʒ̆u, megeem, ki tis zade qini maqu edo ar p̆ap̆axi
domişviya. K̆at̆uk va nusiminu do coğois p̆ap̆axi va uşveen. Amuşeni coğois p̆at̆i
aʒ̆oneen, gui muxteen do k̆at̆us gyatxozeen.
K̆at̆u cas kextu ekolen coğois oʒ̆k̆ert̆u.
-Ar caşa yextimu kodomogui mu iqven! Aşo oxveʒ̆inu
kogyoç̆k̆u coğoik k̆at̆us. Moguina, k̆atta şei gixat̆iupya.
-Aya man amk̆ata vaxtişeni şevinaxepya,- uʒ̆u k̆at̆uk
coğois.
Coğois p̆at̆i gui komuxtu do kogyoç̆k̆u k̆at̆us
olalus, hama mutu var axvenu. Amuşk̆ule coğoi k̆at̆uşa duşmani ren.
[3iala Narak̆iže, “Lazuri T̆ekst̆ebi (174. K̆at̆u do
Coğoi)”, Gamomʒemloba “Batumis Şota Rustavelis Saxelmʒ̆ipo Universit̆et̆i,
Batumi, 2015]
+
[N: coğo(r)i;
mo(r)o; mege(r)em;uşve(r)en; aʒ̆one(r)en;
gu(r)i; muxte(r)en; kodomogu(r)i; mogu(r)ina; gixat̆i(r)upya]
Çiçku
bee do ʒ̆iʒ̆ila
Oxorcak bee onʒ̆elis hogyonciu do muk qona oxaçkuşa
igzalu.
Bee kagok̆uʒxu do omgainu kogyoç̆k̆u.
Komoxtu beeşi omgainuna şignu ʒ̆iʒ̆ila oxoişa. Bees
onʒ̆eli unk̆ans do hem ubirs:
-Bee lulu, bee lulu,
Nanaskani solen mulun?
3iʒiyopşa qonaşen mulun.
Aşoten bee dostibinu do oxorca-na žiu mulunia imt̆u.
[3iala Narak̆iže, “Lazuri T̆ekst̆ebi (166. Çiçku bee do ʒ̆iʒ̆ila)”, Gamomʒemloba
“Batumis Şota Rustavelis Saxelmʒ̆ipo Universit̆et̆i, Batumi, 2015]
+
[N: be(r)e;
hogyonci(r)u; omga(r)inu; omga(r)inuna; oxo(r)işa
ži(r)u ]
