Sum Lazuri ketabi: Daçxuri”, “Si Giçkin” do “Dutxuri
P̆alik̆ari”
I-
“Daçxuri” do “Si Giçkin”- şen oğarğalu (“Nena Minoba Ren”)
“Ho; nena minoba ren. Nena
armitxanişi minoba ren. Mtini giʒ̆vat na, nena ar xalk̆işi k̆olekt̆iuri minoba
ren. K̆aixeşa komiçkinan, nananenati osinapute skidun, zate eşoti skidu nena
andğaşa. Mcveşi orapes, oput̆epes pskidut̆it do nena domibağutes. Mara
andğaneri ndğas noğapes do didi noğapes pskidut do emuşeniti nananena, Lazuri
nenaşi oç̆aru domaç̆irnan. Mektebiti domaç̆irnan. Radio-t̆elevizioniti
domaç̆irnan. Gazetati domaç̆irnan. Lazuri nenate ç̆areli romanepeti, ketabepeti
domaç̆irnan. Nena aşo skidun do emutenti Lazuri minoba.
Lazuri nena ar xalk̆işi nena ren, na
skidun xalk̆işi nena ren. Xitituri nenas na voʒ̆k̆ert steri var voʒ̆k̆ert
Lazuri nenas.
Eşo vit̆oovro (18) ʒ̆ana ʒ̆oxle,
“OGNİ”-s mxuci na komepçit dğalepes, mu xalis vort̆it, eti komiçkinan. Ekolen,
na vigurit ondepeten aʒ̆i ak voret. Aya ren dido k̆ai xali, ma eşo visimadep.
Artikartişen dovigurit do xoloti vigurapt. Nena Ğormotişi dulya ren, aya nenaşa
toli na uğun gamantanerepeşi dulya ren. Emuşeniti nenaşi speros, ok̆oçalişu
domaç̆irnan.
Romani oç̆aruti, makale oç̆aruti
dido meç̆ireli ren. Mara becititi ren. Emuşeni “Daçxuri”-şi maç̆arale Murat
Ercan Murğulişis do “Si Giçkin”-işi maç̆arale Osman Şafak Buyuklus şukuri
vuʒ̆umert. Edo entepes mxuci meçameri iri mitxanisti şukuri vuʒ̆vat.
Açkva aya kitabepe maç̆aralepeşi
var, aya nenaten, Lazuri nenate iderdeps iri k̆oçişi ren. Ğormotik goxelan.”
+ (Jur ketabişi, “Daçxuri” do “Si
Giçkin”- şi K̆okt̆eylis), İsina Bar, Kadikoy, İst̆anboli, 14 VII 2011, Ali
İhsan Aksamazi)
II
“Dutxuri P̆alik̆ari” do “Nananena Dğa”-şen
oğarğalu
“Xeladok̆aobaten
Şurimşine Dalepe- Cumalepe! Aya ren dido beciti dğa. Çkin kok̆ovik̆atit “Nananenaşi Dğa” do Mecit Çakirustaşi ketabi
şeni. Mati minon, giʒ̆vat ar- jur nena.
İpti Lazepeşen mutxanepe giʒ̆vaten: Lazepe dido
mcveşi xalk̆i ren. Mjora, tuta do muruʒxepe steri mcveşi ren. Entepeşi
ist̆oriaten, entepeti nenaten, entepeşi dixaten; Lazepe dunyaşi mcveşi
xalk̆epeşen arteri ren. Aya, xvala ma var giʒ̆umert; andğaneri ndğasti var,
andğaşen sum vit̆oş (3000) ʒ̆ana ʒ̆oxle: Rodosuri Ap̆olloniusik ç̆arupt̆u.
Xvala Rodosuri Ap̆olloniusikti var, Roma do Bizant̆iuri maç̆aralepekti Lazepeşi
ambaepe meçapt̆es. K̆senep̆onikti, P̆liniusiskti, P̆rok̆op̆iusikti,
Agatiasikti, P̆risk̆osikti, Menandrosikti, Arrianusikti, T̆eop̆onesikti Lazepeşi
renoba, Lazepeşi dobadona, Lazepeşi adetepe, Lazepeşi k̆abğapeşen ambaepe
momçapan. Entepeşen vigurapt. Lazepe renan mcveşi xalk̆epeşen Turkiesti,
Okortuesti. Andğaneri ndğasti, Lazepes kuğunan nananena do amuten skidunan.
Lazuri nena ren Lazepeşi minoba do Lazoba emuten skidun.
Mecit Çakirusta Lazepe şeni dido beciti ren. Xvala
umçane, xçetomaloni narenşeni var, eçi
(20) ʒ̆anaşen doni Lazuri nena şeni, Lazuri minoba şeni udodginu na içalişept̆u
şeniti. Aʒ̆i gur- patkaleri vore. Muşeni? Giçkinani?! Ma, Meçit Çakirusta
jureneçidovit (50) ʒ̆anaşen doni viçinop do emuşeni. Eşo ptkvat na, aşo ptkvat
na, jureneçidovit ʒ̆anaşen doni artikarti kok̆oviçinopt mara ar ç̆erişi tudeti
pskidit, jur nek̆na na uğun ar oxoris. Baba çkimişi menabre ren. Biç̆i muşiti
çkimi manebra ren. Ho, antepe doxmeli ambaepe renan. Eşoti ren, komiçkin, mara
beciti ren. Mecit Çakirusta xvala ocaği muşi şeni, mzaxalepe muşi şeni var,
Lazuri nenas mxuci meçaps do Lazuri minobaşi burgilis dermani oqopimu şeni
gzalepeti gorups do emuşeni. Tişineri ren xçetomaloni ren. Emuşeniti emuşen dido ondepe, ambaepe
vigurapt.
Oşi (100) ʒ̆ana ʒ̆oxle Lazepes va uçkit̆es İst̆anboli,
aʒ̆ineri steri. İst̆anboli va rt̆u k̆urbeti entepeşa. Batumişa ulut̆es.
Anak̆liaşa ulut̆es. Soxumişa ulut̆es. Gudautaşa ulut̆es. İçalişept̆es do para
mogapu şeni çarepe gorupt̆es. Mara Mecit Çakirustati, baba çkimiti, majurapeti
Mp̆olişa komoxtes. Batumişa, Anak̆liaşa, Soxumişa, Gudautaşa nek̆nape
genk̆ileri rt̆u do emuşeni. Mecit Çakirusta do majurape İst̆anboli komoxtes do
kodibarges. Aʒ̆i İst̆anbolis skidunan.
Mecit Çakirustaşi skidala xvala Mecit Çakirustaşi
skidala varen, İst̆anbolişa moxtimeri do
dobargeri mtel Lazepeşi skidala ren; entepeşi skidalapeşi yali ren. Emuten ma
minon giʒ̆vat, muşi ot̆obiyografiuli ketabi, “Dutxuri P̆alik̆ari”, xvala muşi
skidalaşi ambai va ren, mara İst̆anbolişa, K̆urbetişa moxtimeri do dobargeri
mtel Lazepeşi ambai ren. Emuşeni beciti ren. Mara ketabi muşi Lazuri narenşeni,
emutenti beciti ren. Lazuri nena ren Ğormotişi noxvene, dulya. Mecit Çakirustak
aya Ğormotoni dulyas mxuci nameçaps şeni, elbet Ğormotik eya kožirasen.
Ğormotik bere- bari k̆ala p̆anda nuşvelas.
Mecit Çakirusta do majurape İst̆anbolişa, K̆urbetişa komoxtes, kodibarges
mara xvala para mogapuşi derdis vart̆es,
mtel Turkieşi xeladok̆aoba şeniti diçalişes. P̆olit̆ik̆uri p̆art̆iepesti
numxvaces, madulyapeşi hak̆k̆epe şeniti diçalişes do k̆abğa komeçes. Emuşeniti xvala bere- bari şeni var, mtel
Turkieşi gurami renan.
Aʒ̆iti “Lazik̆a Gamamşkumaleşi k̆olektivi” şeni
mutxanepe giʒ̆vat, eya minon. Eşo ptkvat na, aşo ptkvat na, eçi (20) ʒ̆ana ʒ̆oxle,
Lazuri nena şeni, Lazuri minoba şeni mutxanepe oxvenuşi gzalepe nabgorupt̆it
varna gzas nagebdgitit oras ç̆areli, gamoçkvineri mutxanepe, heleti Lazuriten
ç̆areli mutxanepe ek̆o dido va miğut̆es.
Mara andğaneri ndğasLazuri ketabepeti, romanepeti, şiirepeti,
ot̆obiyografepeti, mak̆alepeti dido komiğunan. Ma vicer, ç̆umeneri ndğaleps
andğanerişen dahati dido iqvasen amk̆ata noç̆arepe. “Lazik̆a Gamamşkumaleşi
k̆olektivi”- şi roli dido didi do beciti ren aya dulyas. Edo, ma çkimi coxoten,
şukuri vuʒ̆umer mtel Xalk̆is. Şukuri vuʒ̆umert, entepek Ğormotoni dulyas
numxvacupan do emuşeni. Ğormotik entepesti p̆anda nuşvelan. Mara k̆aixeşa
miçkinanki, Lazuri nenaşi oskedinu, Lazuri minobaşi oskidu od oskedinu ar
k̆oçişi, jur k̆oçişi varna ar-jur manebraşi, xvala “Lazik̆a Gamamşkumaleşi k̆olektivi”- şi dulya
varen. Oki aya dulya nena ren, aya minoba ren, hemidros aya ren mtel
gamantanerepesşi dulya. Aya dido becitiren. Emuşeniti aya “k̆olektivi”- s
şurdoguriten mxuci komepçat.
Andğa ren “İnt̆ernasyonaluri Nananenaşi Ndğa”.
Emuşeni ak voret. Mara ipti giʒ̆vat, ma ok̆antaleri Milletepesti (“BM-“isti/
“UN”-isti”), emuşi k̆udeli “UNESCO”-sti ğula voʒ̆k̆er. Emuşeniti dido mtini
sebebepe komiğun. Andğaneri ndğas Lazuri nena p̆at̆işi xalis renna, emuşi
sebebi imp̆eryalist̆epe do entepeşi k̆udeli UNESCO ren. İmp̆eryalist̆epek “Turkuli” burjuvazis, egemenepes numxvaces do
entepekti dobadonaşi majura nenape steri Lazuri nenasti gza va meçes. Edo
Lazuri nena domiyasağes. Mektebepes nananenaşi dersepe va miğut̆es. Lazuri
radiope var miğut̆es. Lazuri ketabepe var miğut̆es. Lazuri teat̆repe va miğut̆es.
Emuşeniti andğaneri ndğas aşo voret. Mara komiçkinan, imp̆eryalist̆epe kuğunan
jur p̆ici- nuk̆u. Arteri ren zalimoba – faşist̆oba. Majurati ren “megabruli”
p̆ici- nuk̆u. Zalim- faşist̆uri p̆ici- nuk̆u munoren? Eya İraqis do Libyas
kobžirit. Suriyeşa mu derdi uğunan entepes, eti miçkinan. “Megabruli” p̆ici-
nuk̆u munoren, eti komiçkinan. Eti ren UNESCO. İmp̆eryalist̆epes “biga- redisi”-şi p̆olit̆ika kuğunan. Eyati
komiçkinan. İmp̆eryalist̆epes na unon steri oxvenuten, nananena var skidun.
Emuşeni UNESCO-şi ezanis quci va miğut̆an. Zate çkin
dido xampa ist̆oria komiğunan, Sovyeturi xeʒalaşi ilkineri ʒ̆anepes Lazuri
mektebepe komiğut̆es. Lazuri nenaşi dersepe komiğut̆es. Lazuri gazeta
komiğut̆es. Lazuri dersişi ketabepe komiğut̆es. Lazuri Teat̆ri komiğut̆es.
Emuşeniti UNESCO- şi ğnositen çkar mutu va maxvenan. Andğaneri ndğas Rusyaşi
Federasyonis, Apxazetis do Okortues na skidunan dalepe- cumalepe komiqounan;
entepes quci mepçat.
Topçioğli Osmani, ʒ̆itaşi İskenderi, Helimişi Xasani
komiqounan. Edo entepeten kovoret, menceloni voret. Xvala ar ʒ̆anas ar ndğaten
var mtel ndğalepeten! Quci na komomçit şeni Ğormotik goxelan.”
+ (Ar ketabişi, “Dutxuri P̆alik̆ari”-şi, do “Nananenaşi
Dğa” -şi K̆okt̆eylis), İsina Bar, Kadikoy, İst̆anboli,19 II 2012, Ali İhsan
Aksamazi)
სუმ ლაზური ქეთაბი: “დაჩხური”, “სი გიჩქინ” დო “დუთხური პალიკარი”
I- “დაჩხური” დო “სი გიჩქინ” -შენ ოღარღალუ (“ნენა მინობა რენ”):
“ჰო; ნენა მინობა რენ. ნენა არმითხანიში მინობა რენ. მთინი გიწვათ ნა, ნენა არ ხალკიში კოლექტიური მინობა რენ. კაიხეშა ქომიჩქინან, ნანანენათი ოსინაფუთე სქიდუნ, ზათე ეშოთი სქიდუ ნენა ანდღაშა. მჯვეში ორაფეს, ოფუტეფეს ფსქიდუტით დო ნენა დომიბაღუთეს. მარა ანდღანერი ნდღას ნოღაფეს დო დიდი ნოღაფეს ფსქიდუთ დო ემუშენითი ნანანენა, ლაზური ნენაში ოჭარუ დომაჭირნან. მექთებითი დომაჭირნან. რადიო - ტელევიძიონითი დომაჭირნან. გაზეთათი დომაჭირნან. ლაზური ნენათე ჭარელი რომანეფეთი, ქეთაბეფეთი დომაჭირნან. ნენა აშო სქიდუნ დო ემუთენთი ლაზური მინობა.
ლაზური ნენა არ ხალკიში ნენა რენ, ნა სქიდუნ ხალკიში ნენა რენ. ხითითური ნენას ნა ვოწკერთ სთერი ვარ ვოწკერთ ლაზური ნენას.
ეშო ვიტოოვრო (18) წანა წოხლე, “ოგნი”-ს მხუჯი ნა ქომეფჩით დღალეფეს, მუ ხალის ვორტით, ეთი ქომიჩქინან. ექოლენ, ნა დოვიგურით ონდეფეთენ აწი აქ ვორეთ. აჲა რენ დიდო კაი ხალი, მა ეშო ვისიმადეფ. ართიქართიშენ დოვიგურით დო ხოლოთი ვიგურაფთ. ნენა ღორმოთიში დულჲა რენ, აჲა ნენაშა თოლი ნა უღუნ გამანთანერეფეში დულჲა რენ. ემუშენითი ნენაში სფეროს, ოკოჩალიშუ დომაჭირნან.
რომანი ოჭარუთი, მაკალე ოჭარუთი დიდო მეჭირელი რენ. მარა ბეჯითითი რენ. ემუშენი “დაჩხური”-ში მაჭარალე მურათ ერჯან მურღულიშის დო “სი გიჩქინ”-ში მაჭარალე ოსმან შაჶაქ ბუჲუქლუს შუქური ვუწუმერთ. ედო ენთეფეს მხუჯი მეჩამერი ირი მითხანისთი შუქური ვუწვათ.
აჩქვა აჲა ქითაბეფე მაჭარალეფეში ვარ, აჲა ნენათენ, ლაზური ნენათე იდერდეფს ირი კოჩიში რენ. ღორმოთიქ გოხელან.”
+ (ჟურ ქეთაბიში, “დაჩხური” დო “სი გიჩქინ”- ში კოქტეჲლის), ისინა ბარ, ქადიქოჲ, ისტანბოლი, 14 VII 2011, ალი იჰსან აქსამაზი)
II-
“დუთხური პალიკარი”
“ხელადოკაობათენ შურიმშინე დალეფე- ჯუმალეფე! აჲა რენ დიდო ბეჯითი დღა. ჩქინ ქოკოვიკათით “ნანანენაში დღა” დო მეჯით ჩაქირუსთაში ქეთაბი შენი. მათი მინონ, გიწვათ არ- ჟურ ნენა.
იფთი ლაზეფეშენ მუთხანეფე გიწვათენ: ლაზეფე დიდო მჯვეში ხალკი რენ. მჟორა, თუთა დო მურუცხეფე სთერი მჯვეში რენ. ენთეფეში ისტორიათენ, ენთეფეთი ნენა თენ, ენთეფეში დიხათენ; ლაზეფე დუნჲაში მჯვეში ხალკეფეშენ ართერი რენ. აჲა, ხვალა მა ვარ გიწუმერთ; ანდღანერი ნდღასთი ვარ, ანდღაშენ სუმ ვიტოშ (3000) წანა წოხლე: როდოსური აპოლლონიუსიქ ჭარუფტუ. ხვალა როდოსური აპოლლონიუსიქთი ვარ, რომა დო ბიზანტიური მაჭარალეფექთი ლაზეფეში ამბაეფე მეჩაფტეს. კსენეპონიქთი, პლინიუსისქთი, პროკოპიუსიქთი, აგათიასიქთი, პრისკოსიქთი, მენანდროსიქთი, არრიანუსიქთი, ტეოპონესიქთი ლაზეფეში რენობა, ლაზეფეში დობადონა, ლაზეფეში ადეთეფე, ლაზეფეში კაბღაფეშენ ამბაეფე მომჩაფან. ენთეფეშენ დოვიგურაფთ. ლაზეფე რენან მჯვეში ხალკეფეშენ თურქიესთი, ოქორთუესთი. ანდღანერი ნდღასთი, ლაზეფეს ქუღუნან ნანანენა დო ამუთენ სქიდუნან. ლაზური ნენა რენ ლაზეფეში მინობა დო ლაზობა ემუთენ სქიდუნ.
მეჯით ჩაქირუსთა ლაზეფე შენი დიდო ბეჯითი რენ. ხვალა უმჩანე, ხჩეთომალონი ნარენშენი ვარ, ეჩი (20) წანაშენ დონი ლაზური ნენა შენი, ლაზური მინობა შენი უდოდგინუ ნა იჩალიშეფტუ შენითი. აწი გურ- ფათქალერი ვორე. მუშენი? გიჩქინანი?! მა, მეჩით ჩაქირუსთა ჟურენეჩიდოვით (50) წანაშენ დონი ვიჩინოფ დო ემუშენი. ეშო ფთქვათ ნა, აშო ფთქვათ ნა, ჟურენეჩიდოვით წანაშენ დონი ართიქართი ქოკოვიჩინოფთ მარა არ ჭერიში თუდეთი ფსქიდით, ჟურ ნეკნა ნა უღუნ არ ოხორის. ბაბა ჩქიმიში მენაბრე რენ. ბიჭი მუშითი ჩქიმი მანებრა რენ. ჰო, ანთეფე დოხმელი ამბაეფე რენან. ეშოთი რენ, ქომიჩქინ, მარა ბეჯითი რენ. მეჯით ჩაქირუსთა ხვალა ოჯაღი მუში შენი, მძახალეფე მუში შენი ვარ, ლაზური ნენას მხუჯი მეჩაფს დო ლაზური მინობაში ბურგილის დერმანი ოყოფიმუ შენი გზალეფეთი გორუფს დო ემუშენი. თიშინერი რენ, ხჩეთომალონი რენ. ემუშენითი ემუშენ დიდო ონდეფე, ამბაეფე ვიგურაფთ.
ოში (100) წანა წოხლე ლაზეფეს ვა უჩქიტეს ისტანბოლი, აწინერი სთერი. ისტანბოლი ვა რტუ კურბეთი ენთეფეშა. ბათუმიშა ულუტეს. ანაკლიაშა ულუტეს. სოხუმიშა ულუტეს. გუდაუთაშა ულუტეს. იჩალიშეფტეს დო ფარა მოგაფუ შენი ჩარეფე გორუფტეს. მარა მეჯით ჩაქირუსთათი, ბაბა ჩქიმითი, მაჟურაფეთი ისტანბოლიშა ქომოხთეს. ბათუმიშა, ანაკლიაშა, სოხუმიშა, გუდაუთაშა ნეკნაფე გენკილერი რტუ დო ემუშენი. მეჯით ჩაქირუსთა დო მაჟურაფე ისტანბოლი ქომოხთეს დო ქოდიბარგეს. აწი ისტანბოლის სქიდუნან.
მეჯით ჩაქირუსთაში სქიდალა ხვალა მეჯით ჩაქირუსთაში სქიდალა ვარენ, ისტანბოლიშა მოხთიმერი დო დობარგერი მთელ ლაზეფეში სქიდალა რენ; ენთეფეში სქიდალაფეში ჲალი რენ. ემუთენ მა მინონ გიწვათ, მუში ოტობიჲოგრაჶიული ქეთაბი, “დუთხური პალიკარი”, ხვალა მუში სქიდალაში ამბაი ვა რენ, მარა ისტანბოლიშა, კურბეთიშა მოხთიმერი დო დობარგერი მთელ ლაზეფეში ამბაი რენ. ემუშენი ბეჯითი რენ. მარა ქეთაბი მუში ლაზური ნარენშენი, ემუთენთი ბეჯითი რენ. ლაზური ნენა რენ ღორმოთიში ნოხვენე, დულჲა. მეჯით ჩაქირუსთაქ აჲა ღორმოთონი დულჲას მხუჯი ნამეჩაფს შენი, ელბეთ ღორმოთიქ ეჲა ქოძირასენ. ღორმოთიქ ბერე- ბარი კალა პანდა ნუშველას. მეჯით ჩაქირუსთა დო მაჟურაფე ისტანბოლიშა, კურბეთიშა ქომოხთეს, ქოდიბარგეს მარა ხვალა ფარა მოგაფუში დერდის ვარტეს, მთელ თურქიეში ხელადოკაობა შენითი დიჩალიშეს. პოლიტიკური პარტიეფესთი ნუმხვაჯეს, მადულჲაფეში ჰაკკეფე შენითი დიჩალიშეს დო კაბღა ქომეჩეს. ემუშენითი ხვალა ბერე- ბარი შენი ვარ, მთელ თურქიეში გურამი რენან.
აწითი “ლაზიკა გამამშქუმალეში კოლექთივი” შენი მუთხანეფე გიწვათ, ეჲა მინონ. ეშო ფთქვათ ნა, აშო ფთქვათ ნა, ეჩი (20) წანა წოხლე, ლაზური ნენა შენი, ლაზური მინობა შენი მუთხანეფე ოხვენუში გზალეფე ნაბგორუფტით ვარნა გზას ნაგებდგითით ორას ჭარელი, გამოჩქვინერი მუთხანეფე, ჰელეთი ლაზურითენ ჭარელი მუთხანეფე ეკო დიდო ვა მიღუტეს. მარა ანდღანერი ნდღას ლაზური ქეთაბეფეთი, რომანეფეთი, შიირეფეთი, ოტობიჲოგრაჶეფეთი, მაკალეფეთი დიდო ქომიღუნან. მა ვიჯერ, ჭუმენერი ნდღალეფს ანდღანერიშენ დაჰათი დიდო იყვასენ ამკათა ნოჭარეფე. “ლაზიკა გამამშქუმალეში კოლექთივი”- ში როლი დიდო დიდი დო ბეჯითი რენ აჲა დულჲას. ედო, მა ჩქიმი ჯოხოთენ, შუქური ვუწუმერ მთელ ხალკის. შუქური ვუწუმერთ, ენთეფექ ღორმოთონი დულჲას ნუმხვაჯუფან დო ემუშენი. ღორმოთიქ ენთეფესთი პანდა ნუშველან. მარა კაიხეშა მიჩქინანქი, ლაზური ნენაში ოსქედინუ, ლაზური მინობაში ოსქიდუ დო ოსქედინუ არ კოჩიში, ჟურ კოჩიში ვარნა არ-ჟურ მანებრაში, ხვალა “ლაზიკა გამამშქუმალეში კოლექთივი”- ში დულჲა ვარენ. ოქი აჲა დულჲა ნენა რენ, აჲა მინობა რენ, ჰემიდროს აჲა რენ მთელ გამანთანერეფესში დულჲა. აჲა დიდო ბეჯითი რენ. ემუშენითი აჲა “კოლექთივი”- ს შურდოგურითენ მხუჯი ქომეფჩათ.
ანდღა რენ “ინტერნასჲონალური ნანანენაში ნდღა”. ემუშენი აქ ვორეთ. მარა იფთი გიწვათ, მა ოკანთალერი მილლეთეფესთი (“ბმ-“ისთი/ “UN”-ისთი”), ემუში კუდელი “UNESCO”-სთი ღულა ვოწკერ. ემუშენითი დიდო მთინი სებებეფე ქომიღუნ. ანდღანერი ნდღას ლაზური ნენა პატიში ხალის რენნა, ემუში სებები იმპერჲალისტეფე დო ენთეფეში კუდელი UNESCO რენ. იმპერჲალისტეფექ “თურქული” ბურჟუვაზის, ეგემენეფეს ნუმხვაჯეს დო ენთეფექთი დობადონაში მაჟურა ნენაფე სთერი ლაზური ნენასთი გზა ვა მეჩეს. ედო ლაზური ნენა დომიჲასაღეს. მექთებეფეს ნანანენაში დერსეფე ვა მიღუტეს. ლაზური რადიოფე ვარ მიღუტეს. ლაზური ქეთაბეფე ვარ მიღუტეს. ლაზური თეატრეფე ვა მიღუტეს. ემუშენითი ანდღანერი ნდღას აშო ვორეთ. მარა ქომიჩქინან, იმპერჲალისტეფე ქუღუნან ჟურ პიჯი- ნუკუ. ართერი რენ ზალიმობა – ჶაშისტობა. მაჟურათი რენ “მეგაბრული” პიჯი- ნუკუ. ზალიმ- ჶაშისტური პიჯი- ნუკუ მუნორენ? ეჲა ირაყის დო ლიბჲას ქობძირით. სურიჲეშა მუ დერდი უღუნან ენთეფეს, ეთი მიჩქინან. “მეგაბრული” პიჯი- ნუკუ მუნორენ, ეთი ქომიჩქინან. ეთი რენ UNESCO. იმპერჲალისტეფეს “ბიგა- რედისი”-ში პოლიტიკა ქუღუნან. ეჲათი ქომიჩქინან. იმპერჲალისტეფეს ნა უნონ სთერი ოხვენუთენ, ნანანენა ვარ სქიდუნ.
ემუშენი UNESCO-ში ეზანის ყუჯი ვა მიღუტან! ზათე ჩქინ დიდო ხამფა ისტორია ქომიღუნან, სოვჲეთური ხეცალაში ილქინერი წანეფეს ლაზური მექთებეფე ქომიღუტეს. ლაზური ნენაში დერსეფე ქომიღუტეს. ლაზური გაზეთა ქომიღუტეს. ლაზური დერსიში ქეთაბეფე ქომიღუტეს. ლაზური თეატრი ქომიღუტეს. ემუშენითი UNESCO- ში ღნოსითენ ჩქარ მუთუ ვა მახვენან. ანდღანერი ნდღას რუსჲაში ჶედერასჲონის, აფხაზეთის დო ოქორთუეს ნა სქიდუნან დალეფე- ჯუმალეფე ქომიყოუნან; ენთეფეს ყუჯი მეფჩათ.
თოფჩიოღლი ოსმანი, წითაში ისქენდერი, ჰელიმიში ხასანი ქომიყოუნან. ედო ენთეფეთენ ქოვორეთ, მენჯელონი ვორეთ. ხვალა არ წანას არ ნდღათენ ვარ მთელ ნდღალეფეთენ! ყუჯი ნა ქომომჩით შენი ღორმოთიქ გოხელან.”
+ (არ ქეთაბიში, “დუთხური პალიკარი”-ში, დო “ნანანენაში დღა” -ში კოქტეჲლის), ისინა ბარ, ქადიქოჲ, ისტანბოლი,19 II 2012, ალი იჰსან აქსამაძი)
https://sonhaber.ch/lazika-yayin-kolektifi-kokteyli-gozlemler-degerlendirmeler/
https://www.circassiancenter.com/tr/mecit-cakirustanin-imza-gunu-etkinligi/
