“Muaciri
kagamaptit çkin” /[Sarpi] 2.
Çxovrooş vit̆oontxo
muarebes aş-ot, akonaşi muarebe iqu. Muaciri kagamaptit çkin. Ma ai
kodopskidi.
Vigzali Turkiaş doloxe, muaciri vigzali. Cebes para va miğun hiç. Ar demirçişa
komepti.
“Mʒika
skanik̆ala moçalişapi do mʒika mç̆k̆idiş para dop̆a”.
“K̆ai iqven!”-ya,
miʒ̆u.
Kamamiqonu, miʒ̆u
ki: “Ar eşşeği miqoun-ya. Aya mekçap-ya do idi-ya, eşşeğite a kyomui
momiği!”-ya. Noşkeri-Lazuri,
Turkuli kyomuri. Manti eşşeğite gzas kogebdgiti. Vidi, vidi, vidi, domimʒ̆k̆upu.
Ar duzi yei t̆u do, ak kodovinciap, ptkvi. Eşşeği viqoni do kap̆is komeok̆ii…
ca mok̆vateis. Megeem ia kap̆i va rt̆een. Deve t̆een, deve cant̆een. Manti
kodovincii.
Dotanu. Aʒ̆i eşşeğişa
mevulur, mevoʒ̆k̆aminon. Eşşeğii koguʒ̆ik̆ideen. Megeem ia kap̆i va
rt̆een. Deve t̆een.
Deve na ser iselu, eşşeği koguʒ̆ik̆idu do doxroʒku. Ma maşkuinu do vimt̆i
ekole. Vimt̆işk̆ule,
eşşeğii mijoleen.
“Moxti, memişoli
do kişaiqonat gzas’”-ya- miʒ̆u k̆oçik.
“K̆ai iqven”-ma
vuʒ̆vi.
Kodolobtiit.
K̆oçik tis kogyak̆nu. Ma k̆udelis kogeak̆ni. Moizditi, k̆udeli kameç̆k̆odu.
K̆oçik: “dop̆ila”-ya
do vimt̆i. Vimt̆i, vidi, vidi gzas, domilumcu.
A oxoişa
komepti.
“Amseri
kodomoncirit!”-ma, vuʒ̆vi.
“K̆ai, iqven”-ia do hodomonciu.
Megeem iya k̆oçiş
oxoi t̆een.
Ser komoxtu
k̆oçi.
“Ar berek-ya eşşeğis
k̆udeli kamemiç̆k̆vidu. P̆ilamint̆u do imt̆u”.
Ma vusimin odaşen.
Penceeşen p̆xont̆i do vimt̆i. Vimt̆i-a, ama mʒ̆k̆upis mani-mani dolokunepe
doloikunap. Oxorcas şavali tis hogoik̆ileen, başluği miçkit̆u. Ekolenti vimt̆i.
Ar k̆aves mileti doxedu, çai supan. Çaixanas kamapti. Selami mepçi.
Aʒ̆ ma: “Şavali
merheba, şavali merheba” miʒ̆umelan. Açkva mendap̆ʒ̆k̆edişi, şavali gomok̆irs. Ekolenti
vimt̆i.
Xolo domimʒ̆k̆upu.
Ar bageni kobžii gzas. Bagenis epti do k̆arvanepe gyobgut̆u. Arteği k̆arvaniş doloxe
komeşapti do kodoincii. Ser xirsuzepe komoxtes. K̆arvani nixirasunonan. Arteğis
goʒ̆k̆edes, çorçi en-ya, tkves, mutu va ren-ya do: majuas na goʒ̆kedes, xolo
çorçi ren-ya, tkves. Ma na meşabxedi k̆arvanis goʒ̆k̆edes. “Aya monk̆a yen.
Topui yopşa en”-ya
tkves.
K̆arvani k̆ap̆ulas
komuik̆ides. Nulvan. Ma doloxe meşapxer.
K̆arvanişe xe
gamaiği do k̆ap̆ulas lemşi meoʒigi k̆oçis.
K̆oçik “but̆k̆uci-a
gemak̆ibinu”-ya, uçkin. Aʒ̆i opsimu unt̆u k̆oçis. Doloxe diben ʒ̆k̆ai. Topui
diben-ya do lok̆upan ʒ̆k̆ai. Xolo mutu va iqu. Doloxendon zori doviqui.
K̆arvanişi saebik, gemotxozun-ya, uçkinan. K̆arvani met̆k̆oçes, yamaşi yeis met̆k̆oçes.
K̆arvani ingibonu. İrmağis kodidgitu.
Mtel kagoidiʒxii.
Baniʒ̆as kodoincii do muarebeti diçodu.
[(Muhamed Narak̆iže, 27.II.1968 ʒ̆.) İrine Asatiani, “Ç̆anuri (Lazuri) T̆ekst̆ebi,
I. Xopuri K̆ilok̆avi”/ Sakartvelos SSR Meʒnierebata Ak̆ademia Enatmeʒnierebis
İnst̆it̆ut̆i/ Masalebi Kartvelur Enata Şesʒ̆avlisatvis, VI/ Gamomʒemloba “Meʒniereba”,
Tbilisi, 1974)]
[(Muhamed Narak̆iže, 27.II.1968 ʒ̆.) İrine Asatiani, “Ç̆anuri (Lazuri) T̆ekst̆ebi, I. Xopuri K̆ilok̆avi”/
Sakartvelos SSR Meʒnierebata Ak̆ademia Enatmeʒnierebis İnst̆it̆ut̆i/ Masalebi
Kartvelur Enata Şesʒ̆avlisatvis, VI/ Gamomʒemloba “Meʒniereba”, Tbilisi, 1974)]
https://aliihsanaksamaz.blogspot.com/2024/10/mamuni-suseli-lamba-termoni-luqu-xavla.html
