“Mamuni”, “şuşeli lamba”, “termoni”, “luqu”, “xavla”, “binconi”, “dorma”...
18.
Bere yezdips mamunik, ena
dibadet̆as. Bere kezdaşk̆ule, kodibadaşk̆ule, bee dobonups,
dok̆iups, nana muşis kilunciaps.
Xut dğaşa ia mamunik beeşa ulun do bonups, xut
dğaşk̆ule onʒ̆elis kogeonciaps.
Beeş nanak ia oxorcas meçaps para, lukuna, sap̆oni, kifit̆i,
yazmati meçaps. Çkvati mutu var.
[Xat̆ice Narak̆iže, 24.VII.1946]
+
19.
Vaxt̆i, zamani t̆u, ki şuşeli
lambas medvinu var uçkit̆eenan. Ar k̆oçik k̆urbetişen lamba
komoncğoneren.
“Aʒ̆i aya lambas muç̆o
meudvinat”-ya do iduşuneenan. Şuşe na muiʒ̆k̆et̆u, va uçkit̆eenan. Ar didi
k̆et̆is daçxii konunʒ̆erenan, şuşeşi jindolen dolonç̆eenan. Daçxiri
kameskieleen.
Saebi muşi moxteen do şuşe moʒ̆k̆eren
do konudvineren. Antepek
ižiʒerenan, gaak̆virelerenan.
[Xat̆ice Narak̆iže, 6.VIII.1946]
+
22. [Termoni]
Buğuli (lazut̆işi ğerğili)
dop̆t̆axupt, uk̆ule dobgibupt. Lobiati kovok̆atept, ar mcixi, ç̆it̆a. Uk̆ule
sağanis kagomʒ̆k̆ipt, mkii ç̆it̆a
do k̆ai kuxugibup. Ç̆it̆ati cumu kuk̆atup, uk̆uleti kagime do
p̆et̆mezi kogilubup do koxuktap.
Ek̆onai ki, loqa na iqven stei. Uk̆ule kogedume sağanepes do
k̆izite imxo.
[Xat̆ice Narak̆iže, 24.VII.1946]
+
23. [Luqu]
En ifti ʒ̆k̆ai konok̆idap. ʒ̆k̆ai
gyagibasşi, luqu kodulubğap. Mʒika na igibas, kaguʒ̆unʒ̆irup.
Uk̆ule ağne ʒ̆k̆ai kogelubap.
Uk̆ule cumu, yaği, p̆ip̆ei duk̆atep. Uk̆uleti igiben, igiben. Uk̆ule
dok̆ank̆up. K̆ank̆up̆t̆aşi, mʒika
mkii uk̆atep. Uk̆ule kuxugibup.
[Xat̆ice Narak̆iže, 24.VII.1946]
+
24. [Xavla]
Xavla ikipan aşo. Hen ʒ̆oxle
mjoli doç̆inaxup, ek̆ule şerbeti muşi donʒ̆iup, ek̆ule şerbeti k̆ai
dogibup do jin na muğas kyopuğepe,
kamojomer. Ek̆ule ia şerbeti mʒika doqinap, ek̆ule
dik̆aşi mkii gilubgap do
dokiminup. Dik̆aşi mkii t̆asinon mç̆ipe. Ek̆ule k̆ai dokiminup, ç̆it̆a
cumuti kogilubğap. Mʒika p̆eci
kiminaginon, mak̆ainaşen mʒika çiçku. Ek̆ule t̆ep̆sis yaği
kogusume do ʒomi kogedume, k̆ai
kagontxip do jin yaği komujusume. Ek̆ule xamiten
doç̆k̆iup. K̆iʒi doç̆k̆vinap, k̆iʒişi
jin t̆ep̆si kogedgip. Jin saci komotume. Maxva kogeoxvap do
diç̆vaşk̆ule, ç̆k̆omap. İa xavla şekeişi,
topurişi, loqa şeepe mteli şeepeşi iqven.
[K̆ak̆ice Narak̆iže, 22.VII.1946]
+
25. [Binconi
(“Turçe: k̆aplava”)]
T̆ağanis yaği kogebdumer, k̆ai yaği
diç̆vaşk̆ule, binci, xorʒi, p̆raskia, gaamso (gaamso yen
mak̆ido) ç̆it̆a xolo p̆ip̆ei
birdem kogeobgap yağoni t̆ağanis, k̆ai doxark̆up, ek̆ule t̆uʒa ʒ̆k̆ai
kogilubap sum faa. Ek̆ule k̆ai
dogibaşk̆ule, ʒ̆k̆ai k̆ai kogiaşiraşi kagimer.
[K̆ak̆ice Narak̆iže, 22.VII.1946]
+
26. [Dorma]
İftişen pat̆icani dogibup ç̆it̆a.
Edo, ki, ena çxip̆t̆a, va iʒ̆ilas. Ena çxa, ç̆k̆emepe mteli
gamaxtasinon. Ek̆ule mkvei cumu
kogusume. ek̆ule k̆ai donʒ̆ilaxup. Ek̆ule brinci, p̆raskia,
gaamso, p̆amidori, xorʒi- antepe
mç̆ipe-mç̆ipe doç̆k̆iup xamiten do pat̆icanis doloxe
komeşobğap. K̆ardalas kodolobğap.
Gibei ʒ̆k̆ari kogeobap. Daçxii nugzap do igiben. Sufa
hododgip… kododgip, sağanepes
kogedume do mʒika dokiaşk̆ule xut k̆itite imxor.
[K̆ak̆ice Narak̆iže, 22.VII.1946]
[(K̆ak̆ice Narak̆iže,) İrine Asatiani, “Ç̆anuri (Lazuri)
T̆ekst̆ebi, I. Xopuri K̆ilok̆avi”/ Sakartvelos SSR Meʒnierebata Ak̆ademia
Enatmeʒnierebis İnst̆it̆ut̆i/ Masalebi Kartvelur Enata Şesʒ̆avlisatvis, VI/
Gamomʒemloba “Meʒniereba”, Tbilisi, 1974)]
https://aliihsanaksamaz.blogspot.com/2024/10/muaciri-kagamaptit-ckin-sarpi-2.html
