10./ “Osinapu”
-Si mu gcoxuns?
-Ğalibi.
-So dibadi?
-Arkabis 1910 ʒ̆.
-Nana do baba kogyonun-i?
-Var, hetepe doğures 1917 ʒ̆. Noğa Unyes.
-Hek mu dulya uğut̆es?
-Hek muhaciri biditdort̆un do doğures.
-Nana do baba giğuru-şi, si nak̆o ʒ̆anei t̆i?
-Şkit ʒ̆aneri bort̆i.
-Si mik̆ala skidut̆i?
- Ma hemindras vit̆ojur [12] ʒ̆aneri cuma miyonut̆u.
-Arkabişe mik̆ala moxti?
-Cuma çkimik̆ala.
-Çkva miti var giyonut̆u-i?
-Jur da Arkabis miyonut̆u.
-Si k̆itxeri yeri?
-Ma ç̆ut̆a k̆itxeri bore.
-Si so ik̆itxi?
-Ma xut-aşi ʒ̆anas Pşartiluğis bik̆itxi.
-Çkva so ik̆itxi?
-Leninişi Noğas bik̆itxi.
-Leninişi Noğas nak̆o ʒ̆anas ik̆itxi?
-Sum ʒ̆ana do ovro tutas bik̆itxi.
-Mu zenaxat̆is ik̆itxomt̆i?
-Ma bik̆itxomt̆i “Sovetuari” ok̆oduşi ot̆delenias.
-Oguru doçodini-r-i Leninişi Noğas?
-Var, maçodinu.
-Mot var gaçodinu?
-P̆at̆i bižabuni do komopti.
-So moxti?
-Soxumişa.
-Haʒ̆i so içalişam?
-Haʒ̆i ʒxara-şubaraşi oput̆eşi Savetis “mamç̆aru”
bore.
-Xvala mamç̆aru yeri?
-Var, ma jur çkva dulya komiğun.
-Mu dulyape giğun?
-Oput̆eşi sudişi “tigemçanu” bort̆i do xolo
obligaʒiaşi “tigemçanu” bort̆i.
-Si k̆omsomoli yeri?
-Ma k̆omsomoli bore 1927 ʒ̆anaşen.
+
-Si mu gcoxuns?
-Sergi.
-Si Lazuri ʒ̆oxle kogiçkit̆u-i?
-ʒ̆oxle ç̆ut̆a miçkit̆u.
-ʒ̆oxle mik̆ala diguri?
-Ma Lazuri domoguramt̆u p̆ropesori Arnold Çikobavak.
-Haʒ̆i Lazuri si k̆ai gaç̆aren-i?
-Lazuri k̆ai bç̆arum do oxoboʒ̆onam, ama k̆ai var
map̆aramiten.
-Lazuri, nena-na oteşkilams, mutu koren-i?
-Muç̆o var! T̆iplisişi Ak̆ademias Nenapeşi Sekʒia ren
do xolo universit̆et̆is iguraman.
-Lazepek iguraman-i?
-Lazepek var, ama çkva st̆udent̆epek iguraman nenaşi
oteşkiluşeni?
-Universit̆et̆is Lazuri mik dogurams?
-Universit̆et̆is Lazuri Nena dogurams p̆rofesori
Arnold Çikobavak.
-Ak̆ademias Lazuri mu ikomt?
-Çkun ak̆ademias biguramt Lazuri nenape do hentepeşi
ʒ̆oxleneri do haʒ̆ineri oskedinupe.
[Sergi Jiğenti, “Ç̆anuri
T̆ekst̆ebi (Arkabuli K̆ilok̆avi), SSRK̆ Meʒnierebata Ak̆ademiis Sakartvelos
Pilialis Gamomʒemloba, T̆pilisi, 1938]
+
75./ “Çkuni “K̆olmani”
Çkuni k̆olmani goynʒ̆k̆u 1930 ʒ̆. 17 K̆unduras.
Ok̆obibğit didi do ç̆ut̆a ar oşi sumeneçidovit [170] k̆oçi, geboç̆k̆it
oçalişus. “K̆olmanişi” Saveturi gzate sumeneçidovit [70] çleni molapxedit ar
barak̆as. Ok̆açxe kok̆obirtit, dobdgit ç̆ut̆a oxorepe. Mç̆imt̆u-ş-k̆ule,
gemomç̆imtes. Medulyapeşi ğnosite geboç̆k̆it oçalişu. Dulya çkuni dik̆aiu.
Gebdgitit k̆ai gzalepes, Saveturi P̆art̆iaşi “Medulyapeşi” p̆lanite dulya
geʒ̆ebincğonit. Hek̆o oxoʒ̆oneri var vort̆it, ne dak̆itxei bordit, p̆olit̆ik̆ur
var miçkit̆es. Heşote koşobibğit. 1935, sumeneçidovit [70] çleni-na bort̆it,
dobivit ovro çleni. Ok̆açxe ğnosi gomanʒ̆k̆es, xe do xes gebagnit, artik̆atis
koxoboʒ̆onapit. Medulyapeşi mencelite 1936 ʒ̆., heşo k̆omunist̆işi p̆art̆iat
xolo kok̆obibğit, ar gurite geboç̆k̆it oçalişu. Haʒ̆i çkuni k̆olmanis ebtit
eçidojur [22] çlenişa. Goʒ̆os na-momçes p̆lani, oş-otxeneç [180] p̆raʒent̆ite
obobşit p̆lani. Hem didi, hem k̆ai! P̆lani obobşit-ş-k̆ule momanžines.
K̆olmanis mulunan, miʒ̆umelan başka kyoişi Lazepek-- “ Muç̆o xali giğunan?
Hanʒ̆o çku va momales, ʒ̆anaşa çku-t moptaten! Tkva k̆ai divit-na, mektebi do
gza dogaxenes-na, çkun k̆olmanis-na boret, barak̆as-na meşapxedit,
ağne ok̆obibğit-ş-k̆ule haʒ̆i eçdovit [30] vaşişi ʒ̆ana, badragepe-na
bort̆it, haʒ̆i oxorepe gebdgit, sumi do otxo odape-na uğunan,
tuğulaşi xenaperi 1932 ʒ̆. tuğulaşi zaodi na bk̆odit, ok̆açxe goşomabğes.
K̆olmanis manžinu-şi, ağne ğnosepete tuğulaşi zaodi ağneşe meabk̆odit. Zaodi
içalişams. K̆at̆a ndğas hek ebodgirt, dido k̆ai tuğulape iven. Ok̆obsvaramt,
hem bikomt oxorepe.
Mektebi do k̆lubi oxonu guris miğunan.
Hemda p̆aten, kimis-ti kogeboç̆k̆it! Ağne na-dodginu Abxazetişi ʒigi, muç̆o
p̆ast̆anavlenias na-vu-steri mektebişeni, berepeşi yaslisşeni, gzalepeşeni p̆ravleniaşi ok̆ap̆et̆anuşeni, çxomi
oç̆opuşeni, t̆eliponişi oxenuşeni, mandalina do meivebeşeni
na-memomsk̆udes, domixenes do keboç̆k̆it oçalişus. Berepeşi yasli
gobonʒ̆k̆it. Mektebişi tuğla xaziri miğunan do majurape, na-ç̆arun, hentepe-ti
oxenuşi miğunan. P̆art̆ia do St̆alinişi ust̆avite eç̆opineri miğunan pucepeşi
do ntxa do mçxurişi k̆olmani. Dahaluk menceli-na va miğunan-şeni, bikomt
tutuni, lazut̆i, tuğla, ore do gedasulebe. Ham ʒ̆anas çku p̆lani xolo obobşamt,
na-momçes noğaşe.
[Sergi Jiğenti, “Ç̆anuri
T̆ekst̆ebi (Arkabuli K̆ilok̆avi), SSRK̆ Meʒnierebata Ak̆ademiis Sakartvelos
Pilialis Gamomʒemloba, T̆pilisi, 1938]
