https://alchetron.com/Byzantine%E2%80%93Sasanian-wars
339./ Lazistanişi Destani
Minon kart̆ali ebzda do
na bžiripe dop̆ç̆ara.
Ma zit̆a k̆oçi va bore, guris memodgin bgara,
Na bzop̆onpe oxoǯonit, çodinaşakis psvara,
Çilambre nak̆o emanç̆as, hek̆onari bibgara.
Svara- çkimis çkvaşi nena ren- na-ti, mobiyvarat
do T̆amt̆ras mupe naç̆aru, iy xolo dogiç̆arat.
+
Geboç̆k̆a xolo birapa mcveşuri
do ha monk̆anobas komuşletun şui.
Bgarini memodgin, opşa ren gui.
İri, mu bogni do bžiri, giǯvaten,
Kemanç̆u- na çkuni nena Lazui.
Dopxedi do bzop̆on iri na mǯori/ (“bmnǯori”),
Ha ç̆ut̆a skidalas na memaç̆aru.
Ma mcoxons Xe-K̆ot̆e, bore Viǯori.
Ognatşk̆ule mo gemiç̆k̆amt obgaru.
Mu na iç̆aren, iri va iven mtini,
Met̆i na t̆u mʒudi ren do ğerdini.
Ma bibira, si ark̆el miç̆andini,
Doptkvat na bognitpe mtini-vamtini!
+
Jur cuma t̆es ar baba do nanaşen,
Dolibaxes ar mʒudişi nenaşen,
Va dodgites, imt̆esdort̆un T̆amt̆raşen,
Xol kok̆ages, komoxtesşi mendraşen.
Ar doyneri ar nanaşi berepe
İbaxet̆es, doloşiyes xamepe,
Diʒxiriten domç̆itanes ğalepe.
Lazepunas komunžines derdepe.
Nana-babas, mu vat̆es, va uçkit̆es.
Koxoǯones: P̆at̆i ves, na yoçkines,
Ç̆ut̆aşendon kyona muşen nuçkines!
İbgart̆es do mu vat̆es, va uçkit̆es.
Eçi ǯana golilu muç̆o mutu,
Eçi ǯanas dido mç̆imu, dido mtu,
Lazi k̆oçik Lazepuna komoktu.
Kiranati iç̆imoşu do iktu.
Bibinetis ʒani çkar va doskidu,
Sinap̆işen P̆oli žiru, hek idu,
Penǯo-mç̆k̆omuk T̆amt̆rasti t̆at̆ komudu,
Haşope memaç̆ares, haşo ç̆arey t̆u.
Va uçkit̆es Lazuy gurişi ç̆vini,
K̆amap lasiyomt̆es, goç̆k̆ondes xini,
Juristi uğut̆es gurepe ini.
Jur cuma t̆es, juriti xol guruni.
Ari na t̆u Kusre P̆arsis keǯarçu,
Majuati Romarepes kodarçu.
Lazepuna ipaluru do iç̆u,
Ğormotikti heya guris va niç̆u.
Ǯanape xval va dodgites, nulut̆es,
Lazistanis çkva mgerepe gulut̆es,
Lazepeti mç̆acepestey ğurut̆es,
Ğalepeti daçxuriten skurut̆es,
Ser-ndğaleyi Urumepe mulut̆es,
Dixa- çkunis mapapestey gulut̆es,
Çkun xamiten ç̆ut̆a-ç̆ut̆a ğurut̆es
do xoloti va goyktes, va nulut̆es,
Ğurut̆es do çkun let̆as amulut̆es.
Cumalepes va uğut̆es oropa,
Doğurines, eşaç̆k̆ides Lazoba,
Gombundğoles, çkva muç̆o bik̆orobat?
Mu ivet̆u, noşkidat̆es berobas!
Uxvene t̆uş, k̆o hemus moç̆k̆odat̆u,
Varna şuri na dgit̆u, noç̆k̆odat̆u!
Berepeşi hulyape va k̆odat̆u,
Çkva mitişi bere ezda- dordat̆u!
K̆ina-tok̆i kogemidves alepes,
Na var amtxu kodolobğes ğalepes.
Didopeti konok̆ides ncalepes,
Va iç̆aren, na naç̆ares Lazepes!
Çkun cixapes çkvaş Ğormoti pxvamumt̆it,
Svara- çkuni çkvaş nenaten psvarumt̆it,
Oç̆aruti çkvaş nenaten p̆ç̆arumt̆it
do haşoten monk̆a-monk̆a pşvanumt̆it.
Ǯanağanis ǯanağani noomt̆u,
Çkva gzalepe çkarikti va goumt̆u,
Oncğoreti çkar mitik va nǯoumt̆u,
Ç̆ut̆a nenas didi xena moomt̆u.
Lazistani ok̆ot̆k̆oçes, met̆k̆oçes,
T̆amt̆ra guri Romarepes nut̆k̆oçes,
Hemtepekti tok̆i mk̆ule mut̆k̆oçes
do Lazepe Lazonaşen get̆k̆oçes.
Hak̆o uça ç̆ara- çkuni iç̆aru,
Lazistanis haşope konaç̆aru,
Hemuşk̆ule bedi va dolaç̆aru,
Mitiksanis hemuşk̆ule var ç̆arun.
Kogoç̆k̆ondes na iğanen piʒari,
Ok̆oç̆k̆ides cumalobaş baǯari,
Oncğore komeçes ğalişi ǯk̆aris,
Haǯi ginon ižiʒini, ibgari!
Ǯanape nulunan, miti va çuman,
Kort̆ui, var t̆ui haşo jur cuma,
Mitis va uçkin, moilu purçuma,
Haşope zop̆onan, gurep miç̆uman.
[Ǯate Baǯaşi
(326.- 346.), Tbilisi, 1968- 1987 (Guram
K̆art̆ozia, “Lazuri T̆ekst̆ebi- II, Gamomʒemloba “Meʒniereba”, Tbilisi,
1993)]
