Biç̆işi
oçilu-1
Biç̆i
oçilamt̆am-şi, biç̆işi nanak porça cana xirk̆a gamakteri dolikunams do bozoşi
oxoşa mendulu do bozoşi nanas uǯumes-ki:
“Gelini!
Ma handğa gamakteri porça dolokuneri komopti bozoşa”.
Nana
Zelixak uǯu-ki:
“Ma
si komekʒadi: Porça gamakteri dologokuns”.
Jurikti
ižiʒines: Ha, ha, ha…
Biçişi
nana uǯu-ki:
“Çkun
biç̆i kelemardes, k̆ai bskidurt, ǯk̆ari gexunerizeni miğunan. Bağu, mandre,
nalya do oxori-ti miğunan do hemuşeni biç̆i oçilu guris dolomangones do,
tkvanik̆ala mzaxaloba-na pate, k̆ai domaǯones”.
Bozoşi
nanak uǯu-ki:
“Heya
ho gelini! Ama ma haǯi si mu giǯva? Si-ti kogiçkin eǯak̆ap̆ineri dulya var
iven. Olumcyaşe badi moxtasen do hemus ma koxoboǯonapam. Si sum ndğa-ş-kule
moxti, ama a’çkva komoli kelik̆ati; muç̆o numsku. Komolik komolis up̆aramitas!”
Haşo
mç̆ipaşaşi koxoǯonapu biçişi nanas. Olumciaşe bozoşi baba komoxtu do oxorca
muşik oxoǯonapams:
“Badi,
bozo domardes, nek̆nape montxams. Bozo gamatxuşi divudoren, şkape golonk̆anams.
Ndğas xut-otxo fara yalis gyoǯk̆edams”.
-Kçini,
si deli yeri? Bozo deli ren-na, dop̆ilat!
--Var,
badi, var! Dulya heşo va ren! Bozo elirda-şi,
gamotxvaman.
--Kçini,
ʒanʒa deli ren-i, vana ma deli bore-i?
--Var,
badi, çkimi, var! Si-ti ğnosari do bozo-ti ğnosari!
--Kçini,
kyerki ho! Mt̆k̆eʒi vana mun ore?
--Badi,
şalapişi dido ğnosari do, k̆ai-na skidunan, k̆oçepe renan. Zenis ǯk̆ari
gyuxenan. Nalya, bağu, mandres do didi oxori-ti gyudginan. Ruşdi ğnosari biç̆i
ren. Baba muşi Xasani-ti dido k̆ai k̆oçi ren, ama ar ç̆ut̆i Cuma uyonun, Lutvi
coxons. He Lutvişi xat̆irişeni do
Xasanişi xat̆irişeni Ruşdis bozo çkuni komepçat.
--Xçini,
dulya heşo ren-na, elçi moxta-şi, bozo komebçat!
Ruşdişi
nana Must̆afa elakk̆ateri moxtu do k̆ai dup̆aramites do imaneti komeçes. Ontxo
ndğa-ş-k̆ule xoca elak̆ateri moxtes do ningyaxi doves do dido şuşepe k̆uzepe
kogoit̆axes. Hek dido osterupe-ti divu. Sum- otxo dğaşi damtiek sicas ç̆anda
duxenu do sica a vit k̆oçik̆ala sica
moit̆u-şi, marteşi biç̆epe sicas gzas kogelut̆k̆obes, ama sica majurani gzate
igzalu do sica var aç̆opes.
Sica
noğamisaşi oxorişa idu-şi, oxrasurepek sica oç̆opes do oxrasurepek martepeşi
bozopek̆ala moselaşa-kis sicas sicalik̆oba oxenapamt̆es. Sicas olumcyaneri
gyari, bak̆lava do kotumeşi t̆rik̆epe, kogoǯucines. Sicaa ğne na t̆u şeni Memed
(Memedi sivişi k̆azancoğli, Omerişi Cuma na-t̆u.)sivişi’steri tolepe patxumt̆u
do gyari var aç̆k̆omu.
Hem
seris moselaşa-kis sicalik̆oba doxenapes. Mosela-ş-k̆ule noğamisa
kodulut̆k̆oçes do majura bozope igzales. Noğame do noğamisa komolaskides. Hem
seriş dido isinapes do noğame mundees moxtat̆u-ti koniaces. Hem seriş te var
gextu-şakis sica gamaxtu do igzalu. Sum tutaşi noğamisaşi moyonuşi didi ç̆anda
doves: Vit, vitoxut k̆oçi gosilaxeri noğamisaşi oxorişa mextes do hek ar k̆ai
gyari oç̆k̆omes do noğamisa komoyones. Noğamisa-ş-k̆ule na moxtes, biç̆epek
sicaşi oxoris dido st̆ak̆ani, k̆uzi do peşkirepe goyxares do kogoit̆axes. Sum
mamuli, otxo kotume, jur çkva monç̆va nixires, oxo mutepeşişa mendiyones.
Osteruşeni hamk̆ata dulyape ikoman Lazepek ç̆andepes.
[Kaynak kitap: Sergi Jiğenti, “Ç̆anuri T̆ekst̆ebi (Arkabuli
K̆ilok̆avi), SSRK̆ Meʒnierebata Ak̆ademiis Sakartvelos Pilialis Gamomʒemloba,
T̆pilisi, 1938, (Tablo: Hasan Helimişi), (Gürcü Alfabesinden Latin Alfabesine
çevriyazı ve düzenleme: Ali İhsan Aksamaz, İstanbul, 1999)]
