Muç̆o k̆idupan
oxori?
Aǯi
ma p̆k̆ida
minon oxoi! Oxoiş ok̆idu guis miğut̆u. Kiraste dağişe
voxvenapamint̆u (oxois-na
unon calepe, mtelis kiraste vuǯumelt!). Ust̆as p̆k̆itxi-ki, “Ar oxoris muk̆o ca unon?”
“Oşeçdovit[130] ca
unon”ya, miǯu.
Usta kodovokaçi,
dağişa igzalu. Calepe mteli dok̆vatu. Ar oxoris vit arkiluği, jureneçi [40] soya do direği, eç [20] çkva unon saraybaği--duşemeşi oç̆k̆adale, tavanişi
oç̆k̆adale, k̆eremidi-na motun. Emus ǯoxle mak̆asi unon, ek̆ule–merteği; ar çkva unon pencerepeşi soyape.
Aǯi
manžagerepe çkimis vucoxi, --noderi p̆i,-- do
manžagerepek memişoles do dağişa vigzalit e-do ia
mteli calepe komoiğit. Aǯi ok̆iduşi usta kodovokaçi. Ustak calepe qazup̆t̆u-şa, manžagerepes
voxveǯi do memişoles
e-do oxoiş
ok̆iduşi yei kagamamtxorit, k̆ai dovoduzanit.
Ustak-ti calepe doxaziru. Bina dodvaluşi vaxtis manžageepe çkimis vucoxi; moxtes, ar ç̆it̆a
daveti dop̆i; ustak-ti
oxoişi bina kododu. Ustas vuǯvi-ki-- “Usta çkimi! Si aǯi
yavaş-yavaş içalişi do ma Kutaisişa vida do keremidi komoiğa“ -ma, vuǯvi. Ustakti—“K̆ai iqven”-ya, tku do ç̆umanişi ma
vigzali. ustapes vuǯvi-ki-“Aǯi ma keremidişa
mevulu. Tkvan giçkinan. K̆ai oxoi
mik̆idit-ki, mitik va memožiʒan!“ Keremidişi yeç̆kopinuşa vigzali. Kutaisis maşinaşen kagepti. Em seris ar oxois doiqvi. Ç̆umanişi dido
gopti; ar yeris k̆ai keremidi
t̆u--komomǯondu. Şilia [1000] keremidi sumeneç [60] manatişen-- otxo şilia [4000] keremidi kyep̆ç̆opi. Em
seis dolumcu. Ç̆umanişi vagonis
mook̆idi e do Batomişa
komoiği.
Batomişa mopti-şi, Kes-oğli Şabanişi mat̆oi do Vanli-oğli Aslaniş mat̆oi ek t̆u. Biç̆epek mžies'ç̆k̆ule
“Xoş geldun! Sefa geldun”-ya, miǯves. “Xoş bulduk, sağolun", vuǯvi. “Amma, a3’i tkvan giçkinan: T̆aonepe
k̆ai en, keremidi Sarpişa miğaginonan”-ma vu3’vi.
Otxo şilia [4000]
keremidi Sarpişa omaluşa. (omaluşeni) mu mekçai“-ma vuǯviş'ç̆k̆ule
– “Si mu zop̆on? Oncğoe va giçkin-i? Si oxoi
mk̆idale k̆oçis keremidi
parate giğat, eşo iqven-i? Mat̆ois
mu-na xarci uğun: başportişi para, damojnaşi do k̆az-yağişi
para komomçit, daha çkin mutu va minonan“ -ya, miǯves...
Em seris
dolumcu. Kodoincirit. Ç̆umanişi t̆aroni k̆ai t̆u. Otxo şilia
keremidi jur mat̆oris komovok̆idi do Sarpişa komoptit. Mʒika mzoğa
dirdu. “Alik keremide komuğu“-ya do
manžagerepe kagextes;
delik̆anlepek dolokunu kamuiǯk̆es: mzoğa
didi-na ren-şeni, mat̆ori (!) gale va gyalen, – mʒika açiğis kogedgitu. Delik̆anepe mzoğas goşaxtes do keremidi xeşen-xeşa guǯuğes do kamopçodit mat̆ori! Keremidi selametişa kagamaiği. Aǯi mat̆orişi derdis kodolobli. Ndğa-xeleri manžagerepek memişveles do mat̆ori kelovonç̆it.
Yarebişukyur!--aya didi
dulyas kamouçiti-ma do kvanç̆alapunas ar k̆ai kelainciri.
Ek̆ule oxoişa vigzali. Ustapes selami douǯvi. Selami kagoǯamiğes. Oxoi duk̆idaput̆es, ç̆it̆a
doskideret̆u.
Ç̆umanişi manžagerepes
ambai mepçi: Oxorcalepe, k̆ulanepe, modidoci
berepe mteli xolo komoxtes: gyaoba iqvet̆u-şa otxo
şilia keremidi oxoişa keşaiği. Ustapek-ti oxoi dok̆ideet̆es, mak̆asis caepe kagontxeret̆es. Ar ucişen majuani ucişa... Ar ucis do
majuani ucis merteğişi direğisteri jur ca konoç̆k̆ades. Calepes
ucis tok̆i kogyudves do
kagontxes. Çkini hadeti ren-ki, ustas baxçişi mumelan: Kimik xum aşuni çiti, kimik xut aşuni mandaboli komuğasinon! Ustak-ti “Manžagerepek baxçişi momimelan”-ya do keseite
mani-mani t̆ank̆ups.
İa tok̆i mteli baxçişiten
ipşu. Sum-otxo dğas oxoişa jin nariş pukiri'steri ivalet̆u. Otxo dğa'ç̆k̆ule
kageǯk̆es. İa
baxçişepe mteli ustaşi en. Aǯi mak̆asi oç̆k̆adus kogyok̆es. Mak̆asi diçodu'ç̆k̆ule
merteli doç̆k̆ades. Merteli
doç̆k̆ades. Merteği-ti diçodu (mak̆asepeşi uci saray-bağis gedumelan; saray bağepe mteli arkiluğis gežin: Mak̆asişi jini uci okiş cas memʒxveri ren. Okişi ca direğepek okaçeps)...
Ustak miǯu-ki—“Aǯi k̆ai
t̆aoni ren-şa, keremidi komovotvat" -ya! Manžageepek memişoles do keremidi çkin oxoişa keviğit. Ustak komotu (teli va unon!). Keremidişi motvalu-ti diçodu. Aǯi ustak
tude içalişeps. Ustas vuǯvi-ki “Oxoi çkimis otxo oda aqvas unon: Arteği – yanişi oda, majurani--şkaşi oda, masumani––yazluği, maotxani- didi oda. Yaniş oda:-- Eger
oxoris baba
koren-na, yaniş oda babaşi ren. Şkaşi oda do yazluği, berepeş onciruşeni, didi oda-ti musafirişeni ren.
Neise, oxoi
dovoçodini! Em k̆işis oxori
direğişi jin kodoskidu; e-na moxtu
Ağust̆ozis t̆aşçi ustape
kodovokaçi tudeni duvari oxvenapuşeni.
Aǯi:
gemtumanişi duvaris k̆anadi uǯumelan, akirişi na-en, duvaris mesoni
uǯumelan. Aǯi ustapek let̆as temeli doxaçkes do didi-didi kvalepe kodolocines. Ek̆ule k̆ai qazeri
kvalepete mesoni do k̆anadi domixvenes.
İa didi dulyaşeni-ti kamouçiti. Oxoişi jini-ti k̆ai kamopǯipxi, tudeni-ti k̆ai kamopǯipxi. Ar dğas dido k̆ai t̆aoni t̆u. Yazluğişi
odas kogolavinciri do mzoğak̆ele viǯk̆et̆i.
Ek̆o k̆ai
raxat̆i viqvi-ki,
kva, nca, piʒari, iri xolo, mu- na ptiri, mu-na viçalişi, iri xolo em dğas kagomoç̆k̆ondu!
Yan odas, şkaşi odas, yazluğis, didi odas piʒarişi duşeme dovoxvenapi. Tavanişeni-ti Batumişen çamiş piʒai komoiği do dovoxvenapi. Oxoiş doloxe-ti, gyari-na ikipan yeris,
let̆a
kogevobği. Yan odas arteği ocaği dovoxvenapi; didi odas voxvenapamint̆u, am para
va meminç̆uşu (va meminç̆işu) do k̆işi moxtu-ç̆k̆ule
ar soba yep̆ç̆opi do
kodobdgi.
Daçxii-na
ogzapan yeris k̆ira kogolabdvi,
xasi kvaşi k̆ira: Çiçku
kva ren, daçxiris va t̆k̆vaʒun; k̆iraşi ok̆açxe kvaşi ok̆iʒale žin:
mç̆k̆idi-na
gedvan, k̆iʒi
k̆iras kododgipan;
mç̆k̆idi diç̆vaç̆k̆ule k̆iʒi kyepatxupan,
mç̆k̆idi kyezdipan, xenǯk̆elis kodolodumelan,
k̆iʒi-ti yezdipan do ok̆iʒales konodgipan.
Gyarişi ogibuşi: --K̆ermuli uǯumelan, demirişi zenciri ongores gedvaleri goǯobun (oxorişi doloxe jur didi ca gonžin,--ongore uǯumelan!). K̆ardalate gyari bgibupt̆at-şi, k̆ardala k̆ermulis goǯovok̆idapt; tencerete bgibupt̆at-şi, sacakis gebdgipt. Sacaki demirişi iqven, sum k̆uçxe uğun.
Oxoi yukseli
ren-na, kvaşi merdiveni (merdeveni) unon (piʒarişi-ti iqven, amus-ti merdeveni vuǯumert). Oxoişi urtişi jin baca ižiren. Dumani gamaxtimuşeni bacas ğormape uğun.
[Kaynak
kitap: Arnold Çikobava, (215. / Kaynak kişi: Ali
Abdul-oğli), “Ç̆anuri T̆ekst̆ebi (Nak̆veti P̆irveli/ Xopuri K̆ilok̆avi”), S. S.
M. U. S. P̆oligrapt̆restis 1-li St̆amba, T̆pilisi, 1929, (Gürcü Alfabesinden Latin Alfabesine çevriyazı: Ali
İhsan Aksamaz, İstanbul, 1999)]
