Xopa ç̆it̆a şeeri ren.
Sok̆aği - otxo ginže sok̆aği en. dukyanepe dido en: Furuni”en, bak̆k̆ali en,
malişi dukyanepe en, demircepe en, k̆alaycepe
(aşo-na oxçaneps k̆alaten) en,
bakirçepe en: sağani, t̆ağani, k̆uk̆uma, k̆ardala, t̆epsi, bakiiş k̆op̆a
(gyais-na
ilumelan, gyais-na oxoktapan) [na ikipan]... Çapulacepe yenan: Çapulape ikipan, potincepe yenan; çizme ikipan... Çapula-na dobruǯas, yama-na ikipan,-- eskicepe en... Ç̆amepe-na gamaçaps, ia ti en. Doxtoi artei en... K̆avepe dido,
dido en. K̆aves k̆umai istenan, çai şupan, k̆ave şupan,
nardi istenan, zay istomelan.
Xopa mskva
şeeri en. Jur mektebi en. Çkini mektebi leili mektebi en. K̆attaşei berepes
Hukumetik meçaps: K̆alemi, kart̆ali, defterepe, k̆urşum-k̆alemi, kitabi, dolokuni, potini, ǯinek̆i, şafk̆a,
k̆aişi, porça
do ijdoni peşkiri, k̆ibirişi furç̆a do k̆ibirişi oçxuşi ç̆ami.
Mektebi sum
k̆ati en.
eçdoxut oda uğun, didi-didi odape. Oxoi kvaşi do gverdi tuğulaşi en: Gverdişi ǯale kva en, gverdişi jile tuğulaşi en. Urti k̆eremidişi uğun.
Urtis demirişi milepe uğun, ǯk̆ari-na
ar yeriş uk̆uibğen do diben. Doloxeni mektebi mu en-i, ptkva-i?
Sandukane: Sanduğepeşi yei (ar odas), majuas -- xua (t̆ani)-na
ibonan, -hamami en; gyari oç̆k̆omuşi jur
oda (yemek-xane); ek̆ule p̆ici-na
vibont musluğepe-ti? P̆ici obonuşi
yeri, sap̆oni...(çeşmexane...), çeçme uǯumelan. Aya,
antepe-na yen, odape, en tudeni k̆atis yen
(anbari-ti en, gyai na
gamimelan). Mudirik na ik̆itxups, mudirik-na ç̆arups, emuşi
odas mudiri en, kyatibi en, (“maç̆aroce” en!) Muellimepe renan xut; anbarişi memuri entepe renan...
Aǯi-- majura
odas berepe renan: Maotxani sinifi en. Masumani -- arteği muelimişi oda, maotxani-- muelimiepe gyai-na
imxonan, emuşi oda, maxutani--xizmetçepeşi oda, maanşani: Ar sifiri, jur sinifi, sum sinifi-- berepe-na kit̆a t̆es,
emuşeni mteli ar yeis, ar odas ik̆itxupt̆es. Maşkvitani-- maxutanişi sinifi; ia-na
dik̆itxan, mektebişen gamulunan; ia mektebişi en didi sinifi en. Daha-ti va en.
Masumani k̆ati: Arteği odas berepeşi onciruşi oda en, didi, mskva, xçe boia svalei. Mutxani xvenei: didi, çimentoşi, ginže, otxo kyoşe-na uğun, mskvanaşeni ikipan. Majuani oda
muelimepe-na
incinan-- otxo muelimi, – ek ren. İa muelimepeşi yatak̆-xane en. Masumani mudiri-na incis, xvala muk, mudirişi yatak-xane en. Maotxani -- žabunepe-na incinan, xolo doxtoişi ç̆amepe-na
uğun, -- oda. Maxutani xolo berepe-na incinan, yatak̆-xane en. Majuani k̆atis merdevenişi
sağis çeçme en, otxo oda çeçme en. En tudeni k̆atis galendo-na amilen, sağik̆ele-- otxo tane çkva-çkva çeçmepe ren.
Mektebişi ok̆açxe ç̆it̆a
jur oda-na uğun, arteğis gyai-na gibupan mutfaği ren, majvara odas berepeşi dolokunepe-na. naxupan, emuşi oda en. Emus (çamaşur-xane) uǯumelan.
Berepe teli
oşi eçidoviti [130] yenan. Muelimepe xuti yen, sinifi-ti xuti en. Xezmetçepe-- sum; gyai-na ikips aşci en,-- ar yen. Ar çkva k̆abepe (Sağani,
k̆izi, çat̆ali, xami)-na çxips
k̆oçi
en. Berepes dolokunu-na unaxups, oxorca-ti en. Arteği çkva,
berepes-na mendaǯk̆es, oxorca
en. Muellimepe teli Turkepe yenan. Berepe-Ti turki renan. Eçidovitoxut [35] bere Lazi en. Xopaşi gyarepe-na gibupan aşci-xane, Hukumetişi davacepeşi yei... Katta
dğa...
Ar dersis
jueneçdoxut dek̆ik̆e vik̆itxupt.
K̆atta dğa
otxo do xut dersi miğunan: Sap̆at̆onis do Yek̆inaças xuti dersi miğunan, daha majuanepes-- Bjaeçxsas,
Tutaçxas, Cumaçxas, Umkeseis-- otxo dersi miğunan. Umkeseis ondğei'ç̆k̆ule-na memaşkvan, P̆arask̆es,-- Sap̆at̆oniş ç̆umanşa, vik̆itaxupt, vist̆ert, saati-- a-la Franga--
çxovros dersişa amavulut. Ç̆umanişi saati
ovros çai pşupt, çai do kuvali vimxort. Saati anşis, axçamiş gyari vimxort. Axçamişi gyari-na op̆ç̆k̆omat, saati
anşi’ç̆k̆ule şkvitişa vist̆ert. Şkviti’ç̆k̆ule tito-tito saatis jur saatişa ç̆umanineri dersepe-–çkini vigurapt. Saatiş çxovros vincirt. Saati şkvitis ç̆umanişi yeiselt.
Majuani k̆atis merdevenik̆ala zili ren. Emuten- berepes gai oç̆k̆omuşeni, onciuşeni,
dersi oguruşeni, dersi ok̆itxuşeni gelaçapan, emuten ducoxoptan. Çkin-ti em vaxtis ok̆oibğert, mu-na iqvasinon, çkini muelimik domiǯumelan.
[Kaynak
kitap: Arnold Çikobava, (191. / Kaynak kişi: Pexri
Tant-oğli), “Ç̆anuri T̆ekst̆ebi (Nak̆veti P̆irveli/ Xopuri K̆ilok̆avi”), S. S. M.
U. S. P̆oligrapt̆restis 1-li St̆amba, T̆pilisi, 1929, (Gürcü Alfabesinden Latin Alfabesine çevriyazı: Ali İhsan Aksamaz,
İstanbul, 1999)]
