Ğirsoni admini, lazdanadami, k̆azeta “Sabah”-işi aya ambai xes komiğun arşivis. Am ambaişi tariği
18 Xrist̆ana 2005 ren. Eşo ptkvatna, aşo ptkvatna, eçi ʒ̆ana ʒ̆oxleni ambai. Hama k̆azeta “Sabah”-is
gamoçkvineri aya ambai tişen k̆udelişa mtini reni; gverdi muşi mtini, gverdi muşi xilafi reni, ia va
maçkinen. Emoras mi mirt̆u, mi mik̆ala rt̆u do mi mik̆ala deli devrişi steri udodginu ixoronapt̆u,
iati va miçkin Aʒ̆iti emuk̆ala eşo deli devrişi steri udodginu naixoronaps miti koreni, iati vamiçkin…
Aʒ̆iti mevzuşa komopta; muşeni p̆ç̆arup… Mi rt̆u am k̆oçi, solen yeçkindu do ipti namu bazi Lazepe
k̆ala irtibati doqu, iya va miçkin. Eşo vana aşo, irtibati oxenus miepek nuşvelu, iati va miçkin.
Ma aʒ̆işa am k̆oçi çkar va viçini hama namamiçkin ia renki, ar mulakati muşi “Kafkasya Yazilari”-s
kogamaxtu. Mati “Kafkasya Yazilari”-şi didilepeşen arteri vort̆i. Aya rt̆u 1999 ʒ̆anas. Ekolen komiçkin.
Uk̆ule ar makale muşi gamiçkvinu “Mjora”-s. Aya rt̆u 2000 ʒ̆anas. Mati “Mjora”-şi didilepeşen arteri
vort̆i hama ʒ̆oxleşen mitik mutu va miʒ̆u do mututi va mk̆itxu. “Mjora” gamaxtuşi, k̆oçişi makale kobžiri
do vik̆itxi. Ant̆in- k̆unt̆inuri mutu va ç̆arupt̆u… Devleti çkinik am k̆oçi Turkiyeşi sinorepeşen muşeni
get̆k̆oçu, ia va miçkin. Elbet ar sebebi kort̆u. Lazepeşi dugunepes ixoronapt̆u do emuşeni geit̆k̆oçinui,
ant̆in- k̆unt̆inuri başka dulyape ikipt̆u do emuşeni geit̆k̆oçinui, ia va miçkin. Hama nagiʒ̆vit jur makale
do “Çiviyazilari”-şen gamoçkvineri jur ketabi muşi k̆ult̆uruli do pelaperi noçalişe ren. Ma “Sabah”-işi
ambaişen aşo matkven do mutu var… Hama tkvan başka mutu mk̆itxatşi, eyati namiçkin k̆onariten
matkven… [Ali İhsan Aksamaz, 30. XII. 2024]
