"Seferberluği do Muhacirluği"/ 79.
Sunduras dovibadi. P̆ap̆uli- çkimi P̆anç̆olai t̆u.
İçilyuşk̆ule Sunduraşa moxtu. Didi nana-çkimi ar oxoiş ar bozo t̆een, emuşeni
didi baba-çkimi sica iquşk̆ule aini oxois doxedeenan. Didi nana- çkimişi cuma
Batumis doğueen. Emuşk̆ule didi nana- çkimişi nanas dido meraği aqveen, sica k̆ala
ek̆o k̆ai var t̆eenan. Didi nana-çkimikti amuşi yuzunden dido sixintepe nʒ̆ieen.
Emuşk̆ule nana- çkimişi nana doğureen.
Didi nana- çkimis şkvit tane bee aqveen, xut tane biç̆i,
jur taneti bozo bere uqount̆u (Bozo bere- Sunduralui eşo ğarğalapan). Didi
nana- çkimi dido çkineri, didi fik̆ioni, dido noseri ar oxorca t̆een. Coxo
çkimiti emuşi coxo en, ma emuşi coxo gemodveenan. Didi baba- çkimiti dido k̆ai k̆oçi
t̆een.
Seferberluğis Sunduralepe telli yiseleenan do Orduşa
ideenan. Jur ʒ̆ana ek doskideenan. Baba- çkimi do didi xala- çkimi ek
dibadeenan. Jur ʒ̆anaşk̆ule tekrar Xopaşa koguikteenan. Em vaxtis dido k̆ai
şeepe naşkveenan oxois, sanduğis altunişi kemeri uğut̆een, ar k̆omşi, manžagei,
va ideen Orduşa, hiç soti va ideen, ek t̆een. Moxteenanşi, hiç mutu va žieenan,
hiç mutu va duskideenan. Entee telli ma miʒ̆umet̆u didi nana-çkimik, elyomoxunap̆t̆u,
antee misvaap̆t̆u. Ma ç̆it̆a bozo vort̆i em vaxtis.
Em vaxtis oxoi- çkini aʒ̆ineişen dido mcve t̆u, aşo
var t̆u, jurk̆at̆li, jur boişi t̆u. Saxanluği uğut̆u oxois. Balk̆oni uʒ̆umelan
Turkuli, Lyazuri- saxanluği. Çkin telli Sunduras dopxedit. Çkimi ocaği Lyok̆manoğlişi
ocaği t̆een. P̆ap̆uli- çkimi Tiflisişa ideen, içalişeen, moxteenşi, na xet̆es
ocağişi yakinis tekrar let̆a eç̆opeen, dahati komunžineenan, ocaği dordeenan.
Didi baba ramet̆li iquşi, beepe- muşik yeepe telli dipaes. Emuşk̆ule aşo telli
oxoepe dik̆idu.
Ma vit̆ootxo ʒ̆ana ʒ̆oxle vikimoci, Xopaşen gamapti,
Aydinişa moptit. Emuşk̆ule Vanişa vidit, Vanişk̆ule Lisbon, Portekizişa vidit.
Emuşk̆ule Aydinişa tekrar kogoviktit. Ek sum ʒ̆anas dopxeditşk̆ule Adanaşa
komoptit. Sum ʒ̆ana en, Adanas pxet. Sum bee- jur biç̆i, ar bozo- miqonun.
[Zekie
Bekyaroğli- Acar, Adana, 31. III. 1990 (Guram K̆art̆ozia, “Lazuri T̆ekst̆ebi- II”, Tbilisi,
1993.]
